A Orde do 27 de decembro de 2016 pola que se regula o recoñecemento de interese sanitario para actos de carácter científico destinados a promover o estudo, difusión, promoción ou especialización das ciencias e técnicas relacionadas coa saúde atribúe, no seu artigo 7.1, á persoa titular da xefatura territorial da consellería con competencia en materia de sanidade da provincia onde se pretenda realizar o acto, reunión, congreso ou actividade, ou, en caso de cursos impartidos exclusivamente por medios telemáticos, á correspondente ao lugar onde estea a sede física da entidade organizadora, resolver, conceder ou denegar o recoñecemento do interese sanitario, logo de proposta do Servizo de Xestión.

Fai falta arbitrar medidas que permitan unha áxil implantación e desenvolvemento da tramitación electrónica deste procedemento de forma que se eviten atrasos ou demoras e, consecuentemente, a Xefatura Territorial da Consellería de Sanidade da Coruña considera oportuno delegar as funcións na materia de recoñecemento de interese sanitario no xefe/a do Servizo de Xestión co obxecto de conseguir unha maior simplificación e axilización dos procedementos administrativos.

Na súa virtude, en uso das facultades que me confire o artigo 19 do Decreto 41/2013, do 21 febreiro, polo que se establece a estrutura orgánica da Consellería de Sanidade, e conforme o disposto no artigo 9 da Lei 40/2015, do 1 de outubro, de réxime xurídico do sector público.

DISPOÑO:

Artigo 1

Deléganse no xefe/a do Servizo de Xestión desta xefatura territorial as seguintes facultades:

a) Resolver, conceder ou denegar o recoñecemento do interese sanitario, unha vez vista a documentación presentada, cos informes e asesoramentos previos que considere pertinentes, e comprobado o cumprimento das condicións e requisitos que lle sexan de aplicación, establecidos na Orde do 27 de decembro de 2016 pola que se regula o recoñecemento de interese sanitario para actos de carácter científico destinados a promover o estudo, difusión, promoción ou especialización das ciencias e técnicas relacionadas coa saúde.

b) Remitir mensualmente á Secretaría Xeral Técnica da consellería con competencia en materia de sanidade unha relación de todos os recoñecementos de interese sanitario outorgados.

Artigo 2

As resolucións administrativas que se adoptan por delegación indicarán expresamente esta circunstancia e consideraranse ditadas polo órgano delegante.

Artigo 3

Exclúense da delegación recollida nesta resolución os supostos referidos no artigo 9.2 da Lei 40/2015, do 1 de outubro, de réxime xurídico do sector público.

Disposición derradeira

Esta resolución entrará en vigor o día seguinte ao da súa publicación no Diario Oficial de Galicia.

A Coruña, 16 de febreiro de 2017

Cristina Pérez Fernández
Xefa territorial da Coruña