Mediante Resolución do 28 de decembro de 2015 (DOG núm. 248, do 30 de decembro) publicáronse as bases reguladoras das axudas para a execución de accións de promoción exterior conxunta das empresas galegas (Galicia Exporta Organismos Intermedios) cofinanciadas polo Fondo Europeo de Desenvolvemento Rexional, no marco do programa operativo Feder Galicia 2014-2020, e procedeuse á súa convocatoria en réxime de concorrencia competitiva.
No punto 11 do artigo 13 destas bases, obrigas dos beneficiarios, establécese a obriga, no caso de postos agrupados de participación en feiras, da utilización do símbolo E de España (en solitario ou acompañado da lenda «España»).
A utilización do mencionado símbolo regúlase nun convenio subscrito entre a Xunta de Galicia e o ICEX, no cal se establece que as actuacións susceptibles de utilizar o símbolo E de España deberán ser comunicadas ao ICEX, que autorizará o seu uso. Na data actual non se dispón de autorización para a utilización do mencionado símbolo nestas actuacións, polo que se considera oportuno eliminar a dita exixencia das bases reguladoras.
O Consello de Dirección do Igape, na súa xuntanza do 22 de decembro de 2016, acordou a modificación das bases reguladoras das axudas para a execución de accións de promoción exterior conxunta das empresas galegas (Galicia Exporta Organismos Intermedios) cofinanciadas polo Fondo Europeo de Desenvolvemento Rexional, no marco do programa operativo Feder Galicia 2014-2020.
Por todo o anterior, de conformidade coas facultades que teño conferidas,
RESOLVO:
Artigo 1
Publicar a modificación das bases reguladoras das axudas para a execución de accións de promoción exterior conxunta das empresas galegas (Galicia Exporta Organismos Intermedios) cofinanciadas polo Fondo Europeo de Desenvolvemento Rexional, no marco do programa operativo Feder Galicia 2014-2020, publicadas mediante Resolución do 28 de decembro de 2015 (DOG núm. 248, do 30 de decembro), no seguinte senso:
Un. No artigo 13, obrigas dos beneficiarios, elimínase o punto 11 e reenumérase o punto 12 que pasa a ser o 11.
Artigo 2
Esta modificación entrará en vigor o mesmo día da súa publicación no Diario Oficial de Galicia.
Santiago de Compostela, 29 de decembro de 2016
Juan Manuel Cividanes Roger
Director xeral do Instituto Galego de Promoción Económica