Mediante Resolución do 16 de decembro de 2015 déuselle publicidade ao acordo do Consello de Dirección que aproba as bases das axudas ao acceso ao financiamento operativo das pequenas e medianas empresas, instrumentadas mediante convenio de colaboración entre o Instituto Galego de Promoción Económica (Igape), as sociedades de garantía recíproca galegas e as entidades financeiras adheridas (Re-solve 2016) (DOG núm. 247, do 29 de decembro).
O importe máximo estimado de operacións financeiras para formalizar ao abeiro da convocatoria foi de 8.000.000 €. Tendo en conta as características deste tipo de operacións (risco moi diversificado, beneficiarias predominantemente pequenas e microempresas e risco compartido con sociedades de garantía recíproca e entidades financeiras) e a porcentaxe histórica de falidos (cun risco razoablemente moderado), dotouse dunha provisión do 10 % por operación de reaval concedida, destinado ao fondo de garantía de avais. Deste xeito, para un máximo de 8.000.000 € en operacións financeiras, o risco máximo por reavais sería de 2.000.000 € (25 %) e suporá a dotación de provisións por importe máximo de 200.000 € para atender posibles falidos (partida orzamentaria 09.A1.741A.8900).
No punto cuarto do Resolvo da Resolución do 16 de decembro de 2015 establecíase un límite máximo de reavais de 2.000.000 €. A data actual, o importe de operacións financeiras a reavalar ascende a 10.540.434,07 € e prevense necesidades por un total de 13 millóns de euros. Para poder reavalar ata o dito importe, estímanse unhas necesidades adicionais de 125.000 € destinados ao fondo de garantía de avais, de maneira que o risco máximo por reavais sería de 3.250.000 €.
O éxito que está tendo este programa para o financiamento das pemes galegas, tanto polo impacto económico posto de manifesto, como polo número de solicitudes que o Igape recibe, aconsella ampliar o crédito dispoñible para o ano 2016.
Na súa virtude e de conformidade coas facultades que teño conferidas,
RESOLVO:
Amplíase para o exercicio 2016 en 125.000 € o fondo de garantía de avais establecido na partida orzamentaria 09.A1.741A.8900, quedando con un importe de 325.000 €, das bases reguladoras das axudas ao acceso ao financiamento operativo das pequenas e medianas empresas, instrumentadas mediante convenio de colaboración entre o Instituto Galego de Promoción Económica (Igape), as sociedades de garantía recíproca galegas e as entidades financeiras adheridas (Re-solve 2016) e establécese un límite máximo de reavais de 3.250.000 €.
Santiago de Compostela, 23 de decembro de 2016
Juan Manuel Cividanes Roger
Director xeral do Instituto Galego de Promoción Económica