A Sala do Contencioso-Administrativo do Tribunal Superior de Xustiza de Galicia requiriu a Dirección Xeral de Centros e Recursos Humanos para que lle remita o expediente administrativo correspondente ao recurso contencioso-administrativo (procedemento dereitos fundamentais 0000141/2016), interposto pola Confederación Intersindical Galega (CIG) contra a Orde do 12 de maio de 2016 pola que se establecen os servizos mínimos dirixidos a garantir os servizos esenciais nos centros públicos integrados dependentes desta consellería durante a folga convocada desde o 18 de maio de 2016, con carácter indefinido, pola Confederación Intersindical Galega (CIG) na empresa Limpiezas del Noroeste, S.A. (Linorsa), publicada no Diario Oficial de Galicia núm. 92, do 16.5.2016.

En consecuencia, segundo o previsto nos artigos 49 e 116 da Lei 29/1998, do 13 de xullo, reguladora da xurisdición contencioso-administrativa e 59.5 da Lei 30/1992, do 26 de novembro, de réxime xurídico das administracións públicas e do procedemento administrativo común, esta dirección xeral acorda:

Remitir, con esta mesma data, o expediente administrativo á sala, o que se notifica para xeral coñecemento de todas as persoas interesadas no procedemento, emprazándoas para que poidan comparecer como parte nos autos ante a Sala do Contencioso-Administrativo do Tribunal Superior de Xustiza de Galicia no prazo de 5 (cinco) días, contados a partir do seguinte ao da publicación deste anuncio no taboleiro de edictos único (TEU) do Boletín Oficial del Estado.

Santiago de Compostela, 30 de maio de 2016

José Manuel Pinal Rodríguez
Director xeral de Centros e Recursos Humanos