O director da Axencia de Protección da Legalidade Urbanística ditou, o 13 de abril de 2016, unha resolución pola que se lle impón unha primeira multa coercitiva derivada do expediente de reposición da legalidade urbanística número IU2/151/2010 a Manuel Domínguez Méndez como consecuencia de incumprir o ordenado na Resolución do 3 de xaneiro de 2012, que ordenaba a demolición de dúas edificacións para usos residenciais, a primeira edificación de grandes dimensións, composta de planta baixa, primeira e segunda planta e planta baixo cuberta, con muros de cerramento de cantería granítica e cuberta inclinada de tella curva; a segunda edificación, é de dúas plantas, a planta baixa con cerramentos realizados con muros exteriores de bloques de formigón e a primeira planta con paramentos de fábrica de ladrillo, sen recebar nin pintar, e non conta con cuberta nin con carpintaría nas fiestras, promovidas polo interesado na parcela con referencia catastral 36027A040004530000ML, no lugar de Morouzos-Dena, no termo municipal de Meaño, provincia de Pontevedra.
Ao non poderse realizar a notificación persoal daquela resolución, mediante esta cédula, e ao abeiro do disposto no artigo 59.5 da Lei 30/1992, de réxime xurídico das administracións públicas e do procedemento administrativo común (LRXPAC), notifícase ao interesado a devandita resolución por medio dun anuncio publicado no Boletín Oficial del Estado.
Tendo en conta que, en atención ao previsto no artigo 61 da LRXPAC, o acto non se publica na súa integridade, fáiselle saber ao interesado que o texto íntegro da resolución que se lle notifica se encontra ao seu dispor nas dependencias da Axencia de Protección da Legalidade Urbanística sitas no Edificio Witland, 1º andar, Salgueiriños, en Santiago de Compostela, para a súa consulta no prazo de 10 días hábiles, que se contarán desde o día seguinte ao da publicación desta cédula no Boletín Oficial del Estado. Transcorrido o devandito prazo, a notificación entenderase producida.
Contra esta resolución, que pon fin á vía administrativa, o interesado poderá interpoñer recurso de reposición no prazo dun mes, contado a partir do día seguinte a aquel en que se teña producido a notificación, ante o director da Axencia de Protección da Legalidade Urbanística, significándolle que o recurso unicamente será admisible por motivos de infracción do ordenamento inherentes á imposición desta multa coercitiva, e que é motivo de inadmisión a reiteración das mesmas razóns que se esgrimiron ou puideron esgrimirse contra a resolución de que este acordo é un mero acto de execución.
No caso de non exercer o seu dereito a presentar recurso potestativo de reposición, pode interpoñer directamente recurso contencioso-administrativo, no prazo de dous meses, ante o xulgado do contencioso-administrativo en cuxa circunscrición se sitúe o inmoble afectado, conforme o disposto no artigo 14.1, regra terceira, da Lei 29/1998, reguladora da xurisdición contencioso-administrativa.
Para que conste e lle sirva de notificación ao citado interesado, en cumprimento do disposto no artigo 59.5 da LRXPAC, expido e asino esta cédula.
Santiago de Compostela, 18 de maio de 2016
José Antonio Cerdeira Pérez
Director da Axencia de Protección da Legalidade Urbanística
