A Orde da Consellería do Medio Rural do 29 de xaneiro de 2016 (DOG nº 20, do 1 de febreiro) regula o procedemento para a solicitude, tramitación e concesión, para o ano 2016, das axudas previstas dentro do réxime do pagamento único e doutros réximes de axuda directa á agricultura e gandaría, e das axudas ao desenvolvemento rural suxeitas ao sistema integrado de xestión e control.
Na súa disposición adicional primeira precísanse as aplicacións orzamentarias e o importe económico previsto para o financiamento das ditas axudas.
Na disposición adicional segunda, sinálase que as dotacións iniciais se poderán incrementar, se for procedente, tramitando o expediente de modificación de crédito oportuno.
Coa finalidade de poder amparar todas as solicitudes das axudas especificadas no título II da orde, relativas aos pagamentos directos á agricultura e á gandaría no marco da aplicación da política agrícola común en Galicia, financiadas polo Fondo Europeo Agrícola de Garantía (Feaga) e xestionadas polo Fondo Galego de Garantía Agraria, posto que a dotación existente resulta insuficiente, a Consellería de Facenda autorizou un expediente de ampliación de crédito por importe de 153.403.634,20 euros e unha incorporación de crédito por importe de 18.271.354,80 euros, polo que cómpre, mediante esta orde, incrementar a dotación orzamentaria consignada para a concesión das mencionadas axudas
En consecuencia, e de conformidade co disposto na Lei 9/2007, do 13 de xuño, de subvencións de Galicia,
DISPOÑO:
Artigo 1. Incremento de crédito
1. A dotación orzamentaria prevista para as axudas especificadas no título II da Orde do 29 de xaneiro de 2016 (DOG nº 20, do 1 de febreiro), conforme a disposición adicional primeira, parágrafo 1, alínea b) da dita orde, increméntase no importe de 171.674.989,00 euros, e con cargo á aplicación 13.80.713F.779.1, primas gandeiras, dos orzamentos da Comunidade Autónoma de Galicia para 2016, polo que o importe total para as axudas desta alínea e desta aplicación orzamentaria, despois deste incremento é de 215.391.408,00 euros.
2. En todo caso, a concesión das axudas reguladas na dita orde estará limitada ás dispoñibilidades orzamentarias.
Artigo 2. Ausencia de efectos sobre o prazo de solicitudes
O incremento de crédito previsto no artigo único desta orde non afecta o prazo de presentación de solicitudes establecido na devandita Orde do 29 de xaneiro de 2016 (DOG nº 20, do 1 de febreiro).
Artigo 3. Recursos
A presente orde, que pon fin á vía administrativa, poderá ser impugnada potestativamente en reposición no prazo dun mes desde a súa publicación, de conformidade co disposto no artigo 116 da Lei 30/1992, de réxime xurídico das administracións públicas e do procedemento administrativo común, ou ser impugnada directamente ante a Sala do Contencioso-Administrativo do Tribunal Superior de Xustiza de Galicia, no prazo de dous meses, segundo o disposto no artigo 46.1 da Lei 29/1998, do 13 de xullo, reguladora da xurisdición contencioso-administrativa, contados a partir do día seguinte ao da publicación desta orde
Disposición derradeira
Esta orde terá efectos a partir do día seguinte ao da súa publicación no Diario Oficial de Galicia.
Santiago de Compostela, 18 de abril de 2016
Ángeles Vázquez Mejuto
Conselleira do Medio Rural