Portos de Galicia executou as obras que se relacionan a continuación, e a empresa Obras, Decoraciones e Instalaciones, S.L. (Odein) presentou as correspondentes garantías definitivas para responder das obrigacións derivadas das ditas obras.
Debido a que ditas obras xa foron executadas hai anos e que as ditas garantías definitivas xa non teñen obxecto por desaparecer a súa obrigación principal, e para os efectos previstos no Real decreto lexislativo 2/2000, do 16 de xuño, polo que se aproba o texto refundido da Lei de contratos das administracións públicas, sométese a información pública a cancelación e devolución das garantías definitivas que se describen:
– Garantía definitiva por un importe de 2.561.386 pesetas (15.394,24 euros), presentada en valores na delegación de Pontevedra da Caixa Xeral de Depósitos da Consellería de Facenda o 23 de xuño de 1999, co número de rexistro 1049/99, para responder das obrigacións derivadas da obra consistente nun edificio de departamentos para usuarios no porto de Combarro. Obra executada e recibida o 15 de novembro de 2000. Prazo de garantía da obra rematado o 15 de novembro de 2001.
– Garantía definitiva por un importe de 464.982 pesetas (2.794,60 euros), presentada en aval bancario na Caixa Xeral de Depósitos da Consellería de Facenda o 2 de agosto de 2000, co número de rexistro 1209/00, para responder das obrigacións derivadas da obra de modificado ás obras do edificio de departamentos para usuarios no porto de Combarro. Obra executada e recibida o 15 de novembro de 2000. Prazo de garantía da obra rematado o 15 de novembro de 2001.
– Garantía definitiva por un importe de 2.274.303 pesetas (13.668,84 euros), presentada en aval bancario na delegación de Pontevedra da Caixa Xeral de Depósitos da Consellería de Facenda o 29 de marzo de 1996, co número de rexistro 219/96, para responder das obrigas derivadas da obra de reparación das lonxas de Vilaboa, Cambados, Portonovo, Cangas, Arcade, Cesantes, Baiona, A Guarda e Vilaboa. Obra executada e recibida o 16 de abril de 1999. Prazo de garantía da obra rematado o día 16 de abril de 2000.
A empresa José Malvar Construcciones, S.L., o 15 de maio de 1996, obrigouse como fiadora da liña de avais, concedidos á empresa Obras, Decoraciones e Instalaciones, S.L., (en diante, Odein, S.L.).
Segundo Borme, Sección I, do 25 de setembro de 2008, nesta data a empresa José Malvar Construcciones, S.L. atópase extinguida e absorbida pola mercantil Sato, Sociedad Anónima Trabajos y Obras, NIF A28030310.
Considerando que desde a finalización das obras de referencia e do seu prazo de garantía non constan incidencias ou reclamacións sobre tales obras; considerando que, polo tanto, a liña de avais prestada por José Malvar Construcciones, S.L. a favor de Odein, S.L. xa cumpriu a súa función de garantía; considerando que Odein, S.L. está liquidada conforme o Rexistro Mercantil de Pontevedra, e sen prexuízo das comunicacións que procedan ao Rexistro Mercantil de Pontevedra previamente á resolución da Presidencia de Portos de Galicia, en canto órgano de contratación das obras garantidas arriba referenciadas, en que acorda a cancelación destas, sométese o expediente de cancelación de avais a información pública por un prazo de vinte días hábiles contados desde a publicación deste anuncio no Diario Oficial de Galicia para que calquera interesado poida consultar e alegar por escrito o que considere conveniente ao seu interese.
O expediente estará á disposición na sede central de Portos de Galicia, sita no portal 5A-6º, Área Central-As Fontiñas, 15707 Santiago de Compostela, na División de Contratación, en horario laboral das 9.00 ás 14.00 horas, de luns a venres.
Santiago de Compostela, 10 de marzo de 2016
José Juan Durán Hermida
Presidente de Portos de Galicia