Dentro do plan de actividades da Escola Galega de Administración Pública para o ano 2016 e de acordo coas funcións atribuídas pola Lei 4/1987, do 27 de maio, de creación da Escola, modificada pola Lei 10/1989, do 10 de xullo, convócanse unhas xornadas sobre os novos fondos europeos e a súa execución en España, conforme as seguintes bases:
1. Obxectivos.
Os fondos europeos constituíron sempre un instrumento de grande importancia para o desenvolvemento de políticas rexionais, sociais ou estruturais en Europa e en España. No ano 2013, o lexislador europeo aprobou o novo «paquete lexislativo» que regulará os fondos europeos para os próximos anos.
O obxectivo destas xornadas é analizar, desde unha perspectiva pluridisciplinar (xurídica, técnica, administrativa e académica), non só o novo marco normativo europeo senón tamén a súa execución en España, abordando cuestións cruciais como a distribución de competencias entre as distintas administracións (europea, estatal ou autonómica), os obxectivos e prioridades temáticas de cada Fondo, os elementos comúns de xestión de todos eles ou a funcionalidade dos contratos administrativos e das subvencións como instrumentos de execución. Desta maneira as xornadas pretenden constituírse nun foro de análise e reflexión sobre os fondos europeos que permita aos distintos actores implicados (administracións, empregados públicos, beneficiarios, etc.) desenvolverse con seguridade no novo marco regulatorio e operativo.
2. Contidos.
Serán tratados, entre outros, os seguintes temas:
‒ Investir nas rexións: a política de cohesión reformada da UE 2014-2020.
‒ Novos e permanentes retos para os Estados membros na xestión dos fondos europeos.
‒ Os fondos europeos en España 2014-2020 (acordo de asociación e xestión compartida entre administracións).
‒ O Fondo Europeo de Desenvolvemento Rexional.
‒ O Fondo Social Europeo.
‒ A implementación dos fondos no novo período de programación 2014-2020.
‒ Programas e proxectos como marco político estratéxico dos fondos europeos.
‒ Os contratos administrativos como instrumentos de execución dos fondos europeos.
‒ As subvencións como instrumentos de execución dos fondos europeos.
‒ Os fondos europeos en Galicia: período 2014-2020.
3. Destinatarios.
Empregados das administracións públicas de Galicia, tanto autonómica como local, das universidades do Sistema universitario de Galicia, persoal das entidades do sector público, xuristas, profesionais e persoas interesadas en xeral.
4. Desenvolvemento.
Lugar: EGAP, salón de actos, rúa Madrid, 2-4, Santiago de Compostela.
Datas: 7 e 8 de abril de 2016.
Horario: día 7, mañá e tarde; día 8, mañá.
Duración: 12 horas lectivas.
5. Número de prazas.
Limitado pola capacidade do local.
6. Inscrición.
As persoas interesadas deberán formalizar a súa inscrición a través da área de matrícula da web da EGAP: https://egap.xunta.es/matricula/.
O prazo para inscribirse estará aberto desde o día seguinte ao da publicación desta resolución no Diario Oficial de Galicia ata as 11.00 horas do 6 de abril de 2016.
Poderá obterse calquera outra información, das 8.30 ás 14.30 horas, nos teléfonos: 981 54 62 41 - 981 54 62 39.
7. Modificacións.
A EGAP reserva para si a facultade de interpretar e de resolver as incidencias que poidan xurdir no desenvolvemento destas xornadas, así como a facultade de cancelalas se o escaso número de solicitudes non xustificase a súa realización.
8. Certificado de asistencia oficial.
Ao final das xornadas entregarase un certificado de asistencia a aquelas persoas inscritas que tivesen participado asiduamente e sempre que a súa asistencia fose igual ou superior ao 90 % das horas lectivas programadas. Neste documento aparecerán, de forma expresa, o contido, a carga lectiva, a data, o lugar de realización das xornadas e o selo oficial da institución.
Santiago de Compostela, 14 de marzo de 2016
Sonia Rodríguez-Campos González
Directora da Escola Galega de Administración Pública