Anúnciase que o Concello Pleno, en sesión ordinaria do día 2 de outubro de 2015, adoptou, entre outros, o seguinte acordo, cuxa parte dispositiva di:

«O Pleno do Concello, por dezaseis votos a favor dos grupos municipais do Partido Popular e PSdeG-PSOE, e once abstencións dos grupos municipais de Democracia Ourensana e Ourense en Común, adoptou o seguinte acordo:

1. Desestimar integramente a alegación presentada por María José Gómez Alonso o 16 de xullo de 2015 con base no exposto nos informes técnico (de data 17 de agosto de 2015) e xurídico (de data 21 de agosto de 2015) emitidos no expediente, que se incorporan como motivadores deste acordo, e dos cales se dará traslado á alegante en forma de copia simple xunto coa notificación individualizada que se lle practique do presente.

2. Aprobar definitivamente a modificación puntual do Plan especial de protección e reforma interior do núcleo histórico de Ourense para a supresión da unidade de actuación nº 14, segundo o documento técnico para aprobación definitiva (DAD) redactado de oficio polo Servizo de Rehabilitación, VPP e PERIS.

3. Comunicar a aprobación definitiva á Consellería de Medio Ambiente, Territorio e Infraestruturas da Xunta de Galicia, e darlle traslado dunha copia autenticada de dous exemplares do instrumento aprobado definitivamente con todos os planos e documentos que integran o plan aprobado definitivamente, debidamente dilixenciados polo secretario xeral do Pleno do concello, e facer constar o dito aspecto.

Réxime de recursos:

Contra o presente acordo, que pon fin á vía administrativa e aproba definitivamente unha disposición de carácter xeral, só poderá interporse recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, no prazo de dous meses contados a partir do día seguinte a aquel en que reciba a presente notificación ou ben no prazo de seis meses contados a partir do día seguinte a que se entenda desestimado por silencio o recurso de reposición que se indica no seguinte parágrafo, se fose interposto, conforme o establecido nos artigos 50 do Real decreto lexislativo 2/2008; 52 da Lei reguladora das bases de réxime local; 194, 209 e concordantes do Regulamento de organización, funcionamento e réxime xurídico das entidades locais; 58 e 117 da Lei de réxime xurídico das administracións públicas e do procedemento administrativo común, así como os artigos 8, 10 e 46 da Lei 29/1998, do 13 de xullo, reguladora da xurisdición contencioso-administrativa.

Non obstante, poderá interporse recurso de reposición, con carácter potestativo, fundamentado exclusivamente en cuestións formais de procedemento administrativo referidas a este expediente no prazo dun mes ante o mesmo órgano que o ditou, conforme o establecido nos artigos 52 da Lei reguladora das bases de réxime local; 194, 209 e concordantes do Regulamento de organización, funcionamento e réxime xurídico das entidades locais, e 58 e 117 da Lei de réxime xurídico das administracións públicas e do procedemento administrativo común».

Con data 26 de outubro de 2015, recibiu o expediente a Consellería de Medio Ambiente, Territorio e Infraestruturas.

Ourense, 26 de outubro de 2015

Jesús Vázquez Abad
Alcalde presidente