A dirección do Centro Universitario da Defensa (en diante, CUD) na Escola Naval Militar de Marín (en diante, ENM), no uso das súas competencias, tras aprobación na reunión do Padroado do 14 de novembro de 2013, de acordo coa disposición adicional décimo oitava (Modalidades de contratación temporal de persoal docente dos centros universitarios da Defensa) da Lei 36/2014, do 26 de decembro, de orzamentos xerais do Estado para o ano 2015, e recibida autorización do Ministerio de Facenda e Administracións Públicas (escrito do 1 de xullo de 2015), resolve proceder ao anuncio da convocatoria de concurso público, polo procedemento de urxencia, para cubrir as necesidades docentes existentes mediante a contratación en réxime laboral de persoal docente, para as seguintes categorías:

Categoría de profesor	Número de prazas
Axudante doutor	1

Este concurso rexerase polo disposto na Lei orgánica 6/2001, do 21 de decembro, de Universidades (LOU), modificada pola Lei orgánica 4/2007, do 12 de abril, así como polo Real decreto 898/1985, do 30 de abril, sobre réxime do profesorado universitario, a Lei 30/1992, do 26 de novembro, de réxime xurídico das administracións públicas e do procedemento administrativo común (en diante, Lei 30/1992), e pola normativa reguladora do procedemento para a provisión de prazas de persoal docente e investigador do CUD na ENM, aprobada na reunión do Padroado do 8 de marzo de 2010.

A información completa (bases da convocatoria, modelo de solicitude, etc.) pode consultarse no taboleiro de anuncios do Centro Universitario da Defensa na Escola Naval Militar (praza de España, s/n, 36920, Marín, Pontevedra) así como na páxina web do Centro Universitario da Defensa (http://cud.uvigo.es – Persoal – Persoal docente e investigador (PDI) – Concursos de profesorado – Noveno concurso de persoal docente contratado (código CPD09)).

O prazo de presentación de solicitudes é de dez días naturais contados a partir do día seguinte ao da publicación deste anuncio no Diario Oficial de Galicia, e deberán dirixilas ao director do Centro Universitario da Defensa no modelo oficial; irán obrigatoriamente acompañadas dos documentos acreditativos previstos na convocatoria.

Marín, 27 de outubro de 2015

José María Pousada Carballo
Director do Centro Universitario da Defensa na Escola Naval Militar de Marín