Descargar PDF Galego | Castellano| Português

DOG - Xunta de Galicia -

Diario Oficial de Galicia
DOG Núm. 189 Venres, 2 de outubro de 2015 Páx. 38490

III. Outras disposicións

Consellería de Traballo e Benestar

RESOLUCIÓN do 24 de setembro de 2015, da Secretaría Xeral Técnica da Consellería de Traballo e Benestar, pola que se declara de interese galego a Fundación Cáritas Diocesana Santiago de Compostela e se ordena a súa inscrición no Rexistro de Fundacións de Interese Galego.

Examinado o expediente de declaración de interese galego e inscrición no Rexistro de Fundacións de Interese Galego da Fundación Cáritas Diocesana Santiago de Compostela, unha vez vista a proposta do subdirector xeral de Coordinación Administrativa, dítase esta resolución baseada nos feitos e fundamentos de dereito que se expoñen a seguir:

Feitos:

Primeiro. José Anuncio Mouriño Raño, secretario do padroado da Fundación, formulou solicitude de clasificación para os efectos da súa inscrición no Rexistro de Fundacións de Interese Galego.

Segundo. A Fundación Cáritas Diocesana Santiago de Compostela foi constituída en escritura pública outorgada en Santiago de Compostela o 5 de xuño de 2015, ante a notaria Inmaculada Espiñeira Soto, co número de protocolo 1.127, por Cáritas Diocesana Santiago de Compostela, representada polo seu director diocesano José Anuncio Mouriño Raño.

Terceiro. Segundo consta no artigo 6 dos seus estatutos, a Fundación ten por obxecto a asistencia social, o fomento da economía social e a promoción e atención ás persoas en risco de exclusión social.

Cuarto. Na escritura de constitución consta a identidade do fundador, a dotación inicial, os estatutos e a identificación dos membros do padroado.

Quinto. Nos estatutos da Fundación consta a denominación e natureza, o domicilio e ámbito de actuación, obxecto e finalidade, as regras para a aplicación das rendas aos fins fundacionais e para a determinación dos beneficiarios, e a designación do padroado inicial.

Sexto. O padroado inicial da Fundación está formado por Víctor Benedicto Maroño Pena, vicario xeral da Diocese de Santiago de Compostela, como presidente; Jesús García Vázquez, delegado episcopal de Cáritas Diocesana Santiago de Compostela, como vicepresidente, e José Anuncio Mouriño Raño, director diocesano de Cáritas Diocesana Santiago de Compostela, como secretario.

Sétimo. A comisión integrada polos secretarios xerais de todas as consellerías na xuntanza do día 10 de xullo de 2015 elevoulle ao vicepresidente e conselleiro de Presidencia, Administracións Públicas e Xustiza proposta de clasificación como de interese asistencial da Fundación Cáritas Diocesana Santiago de Compostela consonte as materias que constitúen o seu obxecto fundacional, polo que, cumpríndose os requisitos exixidos na Lei 12/2006, do 1 de decembro, de fundacións de interese galego, e de conformidade co establecido no artigo 51 do Decreto 14/2009, do 21 de xaneiro, polo que se aproba o regulamento de fundacións de interese galego, e no artigo 7 do Decreto 15/2009, do 21 de xaneiro, polo que se aproba o regulamento do Rexistro de Fundacións de Interese Galego, o protectorado será exercido pola Consellería de Traballo e Benestar.

Oitavo. De conformidade coa dita proposta, por Orde da Vicepresidencia e Consellería de Presidencia, Administracións Públicas e Xustiza de 15 de xullo de 2015 (DOG nº 148, do 6 de agosto), clasificouse como de interese asistencial a Fundación Cáritas Diocesana Santiago de Compostela, e adscribiuse á Consellería de Traballo e Benestar para os efectos do exercicio das funcións de protectorado.

Fundamentos de dereito:

Primeiro. O artigo 34 da Constitución española recoñece o dereito de fundación para fins de interese xeral, e o artigo 27.26º do Estatuto de autonomía para Galicia establece que é competencia exclusiva da Comunidade Autónoma galega o réxime das fundacións de interese galego.

Segundo. De acordo co disposto no artigo 7.2º do Decreto 15/2009, do 21 de xaneiro, polo que se aproba o regulamento do Rexistro de Fundacións de Interese Galego, en relación co Decreto 235/2012, do 5 de decembro, polo que se fixa a estrutura orgánica da Vicepresidencia e das consellerías da Xunta de Galicia e o Decreto 42/2013, do 21 de marzo, polo que se establece a estrutura orgánica da Consellería de Traballo e Benestar, correspóndelle á Consellería de Traballo e Benestar a declaración de interese galego mediante resolución publicada no Diario Oficial de Galicia e a inscrición no Rexistro de Fundacións de Interese Galego da Fundación Cáritas Diocesana Santiago de Compostela, así como o exercicio das funcións de protectorado e as demais que correspondan á Xunta de Galicia de conformidade co indicado no dito regulamento.

Terceiro. Á vista do disposto na Lei 12/2006, do 1 de decembro, de fundacións e interese galego, no Decreto 14/2009, do 21 de xaneiro, polo que se aproba o regulamento de fundacións de interese galego, e no Decreto 15/2009, da mesma data, polo que se aproba o regulamento do Rexistro de Fundacións de Interese Galego, e tras o informe da adecuación e suficiencia da dotación e da idoneidade dos fins, resultan cumpridos os requisitos establecidos pola normativa vixente para a declaración de interese galego e inscrición no Rexistro de Fundacións de Interese Galego, sección da Consellería de Traballo e Benestar, da Fundación Cáritas Diocesana Santiago de Compostela, polo que:

RESOLVO:

Primeiro. Declarar de interese galego a Fundación Cáritas Diocesana Santiago de Compostela, ao cumpriren os seus estatutos as prescricións que, para tal efecto, sinala a vixente lexislación en materia de fundacións de interese galego.

Segundo. Ordenar a inscrición da Fundación Cáritas Diocesana Santiago de Compostela, no Rexistro de Fundacións de Interese Galego, sección da Consellería de Traballo e Benestar.

Terceiro. Esta Fundación queda sometida ao disposto na Lei 12/2006, do 1 de decembro, de fundacións de interese galego, no Decreto 14/2009, do 21 de xaneiro, polo que se aproba o regulamento de fundacións de interese galego, e no Decreto 15/2009, do 21 de xaneiro, polo que se aproba o regulamento do Rexistro de Fundacións de Interese Galego, así como na demais normativa que resulte de aplicación, onde se establecen especialmente as obrigas de dar publicidade suficiente do seu obxecto e actividades, ausencia de ánimo de lucro na prestación dos seus servizos, e presentar anualmente a documentación contable e plan de actuación ante o protectorado, que será exercido por esta Consellería de Traballo e Benestar.

Contra esta resolución, pode interpoñerse recurso de alzada ante a conselleira de Traballo e Benestar, no prazo dun mes contado desde o día seguinte ao da súa publicación, segundo o disposto nos artigos 114 e 115 da Lei 30/1992, do 26 de novembro, de réxime xurídico das administracións públicas e do procedemento administrativo común.

Santiago de Compostela, 24 de setembro de 2015

María Jesús Lorenzana Somoza
Secretaria xeral técnica da Consellería de Traballo e Benestar