En aplicación do disposto na base trixésimo primeira da Orde do 9 de xuño de 2015 (DOG do 22 de xuño) pola que se ditan normas para a adxudicación de destino provisional para o curso académico 2015/16, entre o persoal docente pertencente aos corpos de catedráticos e profesores de ensino secundario, profesores técnicos de formación profesional, catedráticos e profesores de escolas oficiais de idiomas, profesores de música e artes escénicas, catedráticos e profesores e mestres de taller de artes plásticas e deseño, que non teñan destino definitivo na Comunidade Autónoma de Galicia, aos que resultan desprazados por falta de horario, ao persoal a que se lle conceda unha comisión de servizos por concelleira ou concelleiro, por motivos de saúde ou por conciliación familiar, ao persoal opositor, ao persoal interino e substituto e ao persoal funcionario de carreira que solicite o reingreso no servizo activo, a Dirección Xeral de Centros e Recursos Humanos
RESOLVE:
Primeiro. Facer pública, no anexo a esta resolución, a adxudicación dos destinos provisionais obtidos para o curso 2015/16 ao profesorado referido anteriormente.
Segundo. A toma de posesión non poderá supoñer interrupción na prestación de servizos para os profesores interinos con nomeamento en vigor sempre que sexan nomeados dende o inicio do curso 2015/16.
Non obstante o anterior, no caso das comisións de servizo os efectos serán do día 15 de setembro de 2015, sen prexuízo de que as comisións de servizo do profesorado que proceda de fóra da Comunidade Autónoma e os procedentes do estranxeiro teñan efectividade do 1 de setembro de 2015.
Para o persoal en prácticas e o persoal interino sen nomeamento en vigor, os efectos económicos e administrativos serán do día 15 de setembro de 2015.
Terceiro. Os nomeamentos serán remitidos aos interesados ao centro de destino obtido neste proceso.
Cuarto. Contra esta resolución, que esgota a vía administrativa, as persoas interesadas poderán interpoñer recurso potestativo de reposición ante o conselleiro de Cultura, Educación e Ordenación Universitaria no prazo dun mes contado a partir do día seguinte ao da súa publicación no Diario Oficial de Galicia, segundo o disposto nos artigos 116 e 117 da Lei 30/1992, do 26 de novembro, de réxime xurídico das administracións públicas e do procedemento administrativo común, ou ben directamente recurso contencioso-administrativo, no prazo de dous meses, ante o Tribunal Superior de Xustiza de Galicia.
Quinto. Esta resolución entrará en vigor o mesmo día da súa publicación no Diario Oficial de Galicia.
Santiago de Compostela, 10 de setembro de 2015
José Manuel Pinal Rodríguez
Director xeral de Centros e Recursos Humanos
