O Concello de Dumbría solicita a aprobación definitiva do expediente de delimitación do solo do núcleo rural de Olveira, ao abeiro do establecido na disposición adicional segunda.2 da Lei 9/2002, de ordenación urbanística e protección do medio rural de Galicia.
Examinada a documentación remitida polo Concello de Dumbría e vista a proposta subscrita pola Subdirección Xeral de Urbanismo, resulta:
Antecedentes.
1. O Concello de Dumbría carece actualmente de planeamento xeral. Como planeamento aplicable rexen as Normas complementarias e subsidiarias de planeamento da provincia da Coruña, aprobadas definitivamente por Orde da Consellería de Ordenación do Territorio e Obras Públicas do 3.4.1991.
2. A Secretaría Xeral de Ordenación do Territorio e Urbanismo resolveu, con data do 9.12.2009, non outorgar a aprobación definitiva á delimitación do solo de núcleo rural de Olveira, debendo o concello introducir as correccións necesarias para emendar o conxunto de deficiencias relacionadas nesa resolución.
3. Augas de Galicia emitiu informe favorable con data do 1.9.2010.
4. O Pleno do Concello aprobou o proxecto corrixido de delimitación do solo de núcleo rural de Olveira no 4.12.2012.
5. A Dirección Xeral do Patrimonio Cultural emitiu informe favorable o 26.2.2013, condicionado a incorporar as medidas protectoras e correctoras incluídas nel.
6. O secretario municipal emitiu informe no 23.1.2015 previo á aprobación provisional.
7. O pleno do Concello aprobou novamente o proxecto de delimitación do solo de núcleo rural de Olveira subscrito polos arquitectos Daniel Beiras García-Sabell e David Estany Garea, no 27.1.2015.
Análise e consideracións.
1. Obxecto: a proposta delimita como solo de núcleo rural uns 107.246 m2 de superficie que se categorizan como histórico-tradicional, aplicando unha ordenanza definida no propio expediente, con parcela mínima 900 m2 (permítese edificar nas parcelas menores situadas entre outras edificadas) e 0,50 m2/m2 de edificabilidade máxima.
2. Consolidación edificatoria do ámbito delimitado (artigo 13.3 da LOUG): segundo o método numérico da Instrución 4/2011 (DOG núm. 91, do 11 de maio) acreditando unha consolidación do 57,27 %.
3. Distancia do límite proposto respecto das edificacións tradicionais do núcleo (artigo 13.3 da LOUG): a delimitación encerra as edificacións tradicionais do asentamento seguindo o parcelario e as pegadas físicas existentes dentro do máximo de 50 m das devanditas edificacións tradicionais.
En consecuencia, púidose comprobar que se encontran corrixidas as deficiencias sinaladas na anterior resolución desta Secretaría Xeral de Ordenación do Territorio e Urbanismo do 9 de decembro de 2009.
De acordo co punto 2 da disposición adicional segunda da LOUG, e co artigo 12.1.b) do Decreto 316/2009, do 4 de xuño, polo que se establece a estrutura orgánica da Consellería de Medio Ambiente, Territorio e Infraestruturas, a competencia para resolver sobre a aprobación definitiva dos expedientes de delimitación de solo de núcleos rurais corresponde á Secretaría Xeral de Ordenación do Territorio e Urbanismo.
Resolución.
Visto canto antecede,
RESOLVO:
Primeiro. Aprobar definitivamente o proxecto de delimitación do solo de núcleo rural común de Olveira, no concello de Dumbría.
Segundo. Contra esta resolución cabe interpoñer recurso contencioso-administrativo ante o Tribunal Superior de Xustiza de Galicia, no prazo de dous meses, que se contarán desde o día seguinte ao da súa publicación, de conformidade co disposto nos artigos 10 e 46 da Lei 29/1998, do 13 de xullo, reguladora da xurisdición contencioso-administrativa.
3. Notifíquese ao concello e publíquese no Diario Oficial de Galicia.
Santiago de Compostela, 7 de abril de 2015
María Encarnación Rivas Díaz
Secretaria xeral de Ordenación do Territorio e Urbanismo