Mediante a Orde do 18 de setembro de 2012 (DOG do 27 de setembro), fíxose pública a composición dos consellos sociais das universidades de Santiago de Compostela, A Coruña e Vigo.

A Lei 6/2013, do 13 de xuño, do Sistema universitario de Galicia, establece que o consello social estará integrado por un máximo de trinta e un membros.

O artigo 77.2 da citada Lei 6/2013 establece que son membros natos do consello social o reitor/a da universidade, o secretario/a xeral e o/a xerente da universidade. Así mesmo, serán membros do consello social un profesor ou unha profesora, un ou unha estudante e un ou unha representante do persoal da administración de servizos, elixidos/as polo consello de goberno das universidades. A duración do mandato dos membros do consello social sinalados neste punto será establecida polos estatutos da universidade.

O Decreto 14/2014, do 30 de xaneiro (DOG do 12 de febreiro), polo que se aproban os estatutos da Universidade de Santiago de Compostela, regula no seu artigo 71.3 que «O mandato dos órganos unipersoais electivos será de catro anos e non se poderá ocupar o cargo máis de dous mandatos consecutivos» e o artigo 74.3 recolle que «Os membros do Consello Social elixidos polo Consello de Goberno deberán reunir os requisitos exixidos no artigo 71 para seren titulares de órganos unipersoais».

A condición de membro do consello social adquírese unha vez cumpridos os requisitos de designación, nomeamento e publicación no Diario Oficial de Galicia, e produce efectos a partir desa data.

Con do data 13 de abril de 2015 o Consello Social da Universidade de Santiago de Compostela remite ao conselleiro de Cultura, Educación e Ordenación Universitaria certificación da secretaria xeral da Universidade comunicando que o Consello de Goberno, na sesión do 2 de marzo de 2015, adoptou o acordo de designar como membros no Consello Social a Javier Bueno Lema, en representación do PDI, Iván Rodríguez Iglesias, en representación do alumnado e Antonio de Padua Pérez Casas, en representación do PAS. Xúntanse declaracións de non estaren incursos nas incompatibilidades sinaladas no artigo 78 da mencionada Lei 6/2013.

O artigo 77.4 da Lei 6/2013, do 13 de xuño, establece que os acordos de designación de membros do consello social lle seran comunicados á persoa titular da consellería competente en materia de universidades, quen procederá ao seu nomeamento mediante orde da súa consellería.

Por todo iso,

DISPOÑO:

Artigo 1

Nomear a Javier Bueno Lema, como representante do persoal docente e investigador no Consello Social da Universidade de Santiago de Compostela, en substitución de Julio Antonio Seijas Vázquez.

Artigo 2

Nomear a Iván Rodríguez Iglesias como representante do alumnado no Consello Social da Universidade de Santiago de Compostela, en substitución de Santiago Piñeiro Edreira.

Artigo 3

Dar continuidade ao nomeamento de Antonio de Padua Pérez Casas, renovado polo Consello de Goberno, como representante do persoal de administración e servizos no Consello Social da Universidade de Santiago de Compostela.

Disposición derradeira

Esta orde entrará en vigor o mesmo día da súa publicación no Diario Oficial de Galicia.

Santiago de Compostela, 22 de abril de 2015

Román Rodríguez González
Conselleiro de Cultura, Educación e Ordenación Universitaria