A Orde da Consellería de Facenda do 9 de maio de 2014 (DOG núm 99, do 26 de maio) pola que se convoca o proceso selectivo para o ingreso no corpo facultativo de grao medio da Xunta de Galicia, subgrupo A2, escala de enxeñeiros/as técnicos/as de minas, dispón na base II.1.1.1 que o prazo máximo para a realización do primeiro exercicio será de corenta (40) días hábiles desde a constitución do tribunal que xulgue as probas.
Unha vez constituido este o día 30 de marzo de 2015, tendo en conta diversas cuestións relacionadas co desenvolvemento dos exercicios e a proposta elevada para tal efecto polo tribunal cualificador deste proceso selectivo, de conformidade co establecido no artigo 49 da Lei 30/1992, do 26 de novembro, de réxime xurídico das administracións públicas e do procedemento administrativo común, esta consellería
DISPÓN:
A ampliación do prazo de realización do primeiro exercicio do proceso selectivo para o ingreso no corpo facultativo de grao medio da Xunta de Galicia, subgrupo A2, escala de enxeñeiros/as técnicos/as de minas, en quince días hábiles.
Contra este acordo de ampliación de prazo non cabe recurso ningún, de acordo co disposto no artigo 49.3 da Lei 30/1992, do 26 de novembro, de réxime xurídico das administracións públicas e do procedemento administrativo común.
Santiago de Compostela, 13 de abril de 2015
Valeriano Martínez García
Conselleiro de Facenda