A Consellería de Presidencia, Administracións Públicas e Xustiza está a tramitar o anteproxecto da Lei de transparencia e bo goberno, que ten por obxecto regular a transparencia na actividade da Administración pública e o dereito da cidadanía a acceder á información pública, así como establecer o réxime xurídico das obrigas de bo goberno que deben cumprir os responsables públicos, incluíndo o seu réxime de incompatibilidades, de conflito de intereses e de control dos seus bens patrimoniais.
En virtude do exposto no artigo 7.4 do Decreto 111/1984, do 25 de maio, polo que se aproba o Regulamento de réxime interior da Xunta de Galicia, modificado polo Decreto 57/1994, do 25 de marzo, e co fin de garantir unha maior participación da cidadanía neste trámite administrativo,
ACORDO:
Someter a información pública, por un prazo de quince días hábiles que se contarán desde o día seguinte ao da publicación deste anuncio, o anteproxecto da Lei de transparencia e bo goberno.
O texto do anteproxecto de lei poderase consultar no seguinte enderezo electrónico:
http://cpapx.xunta.es/normativa-en-tramitacion/
As persoas interesadas, dentro do prazo sinalado, poderán enviar as súas alegacións preferentemente mediante correo electrónico ao seguinte enderezo: dxara@xunta.es ou, alternativamente, mediante a presentación dun escrito dirixido á Secretaría Xeral Técnica da Consellería de Presidencia, Administracións Públicas e Xustiza en calquera dos lugares previstos no artigo 38.4 da Lei 30/1992, do 26 de novembro, de réxime xurídico das administracións públicas e do procedemento administrativo común.
Santiago de Compostela, 26 de marzo de 2015
Beatriz Cuiña Barja
Secretaria xeral técnica da Consellería de Presidencia,
Administracións Públicas e Xustiza