Mediante Resolución do 22 de setembro de 2014 (DOG núm. 186, do 30 de setembro) publicáronse as bases reguladoras para a habilitación dunha liña de avais do Instituto Galego de Promoción Económica (Igape) para facilitar ás empresas galegas auxiliares do sector naval o acceso ao financiamento operativo adicional, instrumentadas mediante convenio coas entidades colaboradoras.
No artigo 14.3.2 establécese a documentación que as beneficiarias, a partir da formalización de cada operación de aval, deben remitir ao Igape, concretamente que transcorridos 30 días desde o vencemento do prazo da operación avalada, deberán enviar a memoria asinada polo administrador, na cal se faga referencia aos seguintes datos: importe das exportacións realizadas no período de vixencia da operación e nos dous anos anteriores, porcentaxes que representa respecto da facturación total e países de destino dos produtos exportados.
Ante a necesidade de acreditar que o financiamento foi destinado á súa finalidade, é dicir, á subministración de bens ou servizos a un estaleiro da Comunidade Autónoma e non ás exportacións realizadas, procede realizar a correspondente modificación, a cal foi aprobada polo Consello de Dirección do Igape na súa xuntanza do 18 de decembro de 2014.
Na súa virtude e de conformidade coas facultades que teño conferidas,
RESOLVO:
Primeiro. Publicar a modificación das bases reguladoras para a habilitación dunha liña de avais do Instituto Galego de Promoción Económica (Igape) para facilitar ás pequenas e medianas empresas galegas, auxiliares do sector naval, o acceso a financiamento operativo adicional, instrumentadas mediante convenio coas entidades colaboradoras, publicadas mediante Resolución do 22 de setembro de 2014 (DOG núm. 186, do 30 de setembro), no seguinte senso:
– Modifícase o artigo 14.3.2, que queda redactado do seguinte xeito:
«A partir da formalización de cada operación de aval, as beneficiarias deberán remitir ao Igape a documentación que se relaciona a seguir:
Mentres a operación de aval se atope en vigor:
– Copia cotexada das contas anuais que se aproben durante a vixencia do aval. Deberá incluírse o informe de auditoría, se é o caso. Deberán remitirse no prazo de 30 días desde a súa aprobación.
– Comunicación ao Igape, se é o caso, dos cambios na súa estrutura accionarial, xerencia, órganos de goberno ou administración, desde a última comunicación. Deberá remitirse no prazo de 30 días desde que se produzan os cambios.
Ata 30 días desde o vencemento do prazo da operación avalada:
– Copia cotexada dos contratos de subministración de bens ou servizos asinados co estaleiro ou estaleiros da Comunidade Autónoma de Galicia durante a vixencia do aval, non achegados inicialmente coa solicitude».
Segundo. Esta modificación entrará en vigor o mesmo día da súa publicación no Diario Oficial de Galicia.
Santiago de Compostela, 29 de decembro de 2014
Javier Aguilera Navarro
Director xeral do Instituto Galego de Promoción Económica