A directora da Axencia de Protección da Legalidade Urbanística, o día 1 de outubro de 2014, ditou resolución:

1. Pola que declara que a actividade de almacenamento, depósito de vehículos e comercialización de material de despezamento propia dun taller que se desenvolve mediante a instalación dunhas estruturas metálicas, nas parcelas 116 e 117 do polígono 57, no lugar de Quintáns, parroquia de Simes, no termo municipal de Meaño, é unha actividade ilegalizable.

2. Pola que se ordena a paralización inmediata da actividade descrita no parágrafo primeiro e a demolición ou retirada das ditas estruturas citadas no dito parágrafo e a reposición da legalidade urbanística dos terreos afectados ao estado anterior ao inicio das obras e da actividade desenvolvida á súa custa.

3. Pola que se declara que as obras de construción dunha planta baixa vinculada ao uso de taller, nas parcelas 250 e 251 do polígono 64, no lugar de Quintáns, parroquia de Simes, no termo municipal de Meaño, son ilegalizables.

4. Pola que se ordena a demolición das obras descritas no parágrafo terceiro á súa custa e a reposición dos terreos afectados ao estado anterior ao inicio das obras, así como o cesamento definitivo dos usos a que desen lugar.

As anteriores ordes contidas nos parágrafos segundo e cuarto desta resolución deberán ser executadas no prazo de tres meses contados desde a notificación da presente resolución, e daráselle conta á Axencia de Protección da Legalidade Urbanística.

5. Pola que se resolve dar traslado á persoa titular da alcaldía do Concello de Meaño do expediente de reposición da legalidade urbanística número PON/53/2013, incoado en relación coas obras de cerramento de predio cun muro de pedra na fachada e muro de bloque revestido nos demais ventos e o estacionamento de vehículos no interior do predio para que, no exercicio das súas competencias, adopte todas as medidas necesarias para a protección da legalidade urbanística, segundo o disposto no capítulo III do título IV da LOUG.

Ao non poderse realizar a notificación persoal daquela resolución a Vicente Souto Castro, mediante esta cédula e ao abeiro do disposto no artigo 59.5 da Lei 30/1992, do 26 de novembro, de réxime xurídico das administracións públicas e do procedemento administrativo común (LRXPAC), notifícaselle ao interesado a dita resolución.

Tendo en conta que, en atención ao previsto no artigo 61 da LRXPAC, o acto non se publica na súa integridade, fáiselle saber ao interesado que o texto íntegro da resolución que se notifica se encontra ao seu dispor nas dependencias da Axencia de Protección da Legalidade Urbanística sitas no Edificio Witland, Salgueiriños, Santiago de Compostela, para a súa consulta no prazo de 10 días hábiles, que se contarán desde o día seguinte ao da publicación desta cédula. Transcorrido o dito prazo a notificación entenderase producida.

Contra a dita resolución, que pon fin á vía administrativa, o interesado pode interpor recurso de reposición no prazo dun mes, contado a partir do día seguinte a aquel en que se teña producido a notificación, ante a directora da Axencia de Protección da Legalidade Urbanística, ou ben, se non exerce o seu dereito a presentar recurso potestativo de reposición, pode interpor directamente recurso contencioso-administrativo, no prazo de dous meses, ante o Xulgado do Contencioso-Administrativo en cuxa circunscrición radique o inmoble afectado, conforme o disposto no artigo 14.1, regra terceira, da Lei 29/1998, reguladora da xurisdición contencioso-administrativa.

Para que conste e lle sirva de notificación ao citado interesado en cumprimento do disposto no artigo 59.5 da citada Lei 30/1992, do 26 de novembro, expido e asino esta cédula.

Santiago de Compostela, 27 de outubro de 2014

María Martínez Allegue
Directora da Axencia de Protección da Legalidade Urbanística