A obra correspondente ao proxecto de execución da obra hidráulica de mellora dos bombeos de Esteiro e Sabuqueiro e de telexestión, Boiro (A Coruña), de clave: OH.315.1029, é considerada de interese da Comunidade Autónoma, xa que está incluída no Plan hidrolóxico da Demarcación Hidrográfica de Galicia-Costa, aprobado polo Real decreto 1332/2012, do 14 de setembro.
No proxecto defínense e valóranse as actuacións necesarias para renovar e mellorar a rede de saneamento de augas residuais de Boiro, que conta con catro elementos principais conectados en serie: tanque de Chouza, bombeo de Esteiro, bombeo de Sabuqueiro e estación depuradora de augas residuais de Cabo de Cruz.
A actuación hidráulica cofinánciaa a Unión Europea a través do Fondo Europeo de Desenvolvemento Rexional (Feder) nun 80 %, no marco do programa operativo Feder Galicia 2007-2013, eixe 3: ambiente, contorno natural, recursos hídricos e prevención de riscos; tema prioritario ou medida 46: tratamento de augas residuais.
Considerando o exposto, ao abeiro do previsto na Lei 9/2010, do 4 de novembro, de augas de Galicia, no Estatuto da entidade pública empresarial Augas de Galicia, aprobado polo Decreto 32/2012, do 12 de xaneiro, e segundo o disposto no artigo 12.c) do Decreto 59/2013, do 14 de marzo, polo que se desenvolve a Lei 9/2010, do 4 de novembro, de augas de Galicia, en materia de execución e explotación de infraestruturas hidráulicas,
RESOLVO:
Someter a información pública o proxecto de mellora dos bombeos de Esteiro e Sabuqueiro e de telexestión, Boiro (A Coruña), de clave: OH.315.1029, durante un prazo de trinta días, contados a partir do día seguinte ao da publicación deste anuncio no Diario Oficial de Galicia.
Durante o prazo anteriormente sinalado, o documento técnico poderá consultarse nas dependencias de Augas de Galicia, sitas na rúa Doutor Maceira, nº 18, baixo, Santiago de Compostela (A Coruña), e na páxina web http://augasdegalicia.xunta.es e poderán dirixirse ao mesmo enderezo as alegacións ou consideracións que se consideren oportunas.
O que se fai público para todos os efectos legais e regulamentarios de aplicación na materia e para o seu coñecemento xeral.
Santiago de Compostela, 23 de outubro de 2014
Gonzalo Mosqueira Martínez
Director de Augas de Galicia