En virtude das ordes do 10 de marzo de 2008, do 27 de decembro de 2010 e do 25 de maio de 2012 (Diario Oficial de Galicia núm. 56, do 24 de marzo, núm. 1, do 3 de xaneiro de 2011 e núm. 103, do 31 de maio de 2012, respectivamente) convocáronse procesos selectivos para o ingreso no corpo de xestión de Administración da Xunta de Galicia, subgrupo A2, escala técnica de finanzas.

Polas ordes do 30 de marzo de 2010 (Diario Oficial de Galicia núm. 64, do 7 de abril), do 8 de marzo de 2013 (Diario Oficial de Galicia núm. 55, do 19 de marzo) e do 28 de maio de 2014 (Diario Oficial de Galicia núm. 106, do 5 de xuño) foron nomeados/as funcionarios/as da dita escala e adxudicáronselles destinos provisionais aos/as aspirantes que superaron os procesos selectivos convocados polas ordes do 10 de marzo de 2008, do 27 de decembro de 2010 e do 25 de maio de 2012, respectivamente.

En atención a todo o exposto e segundo o disposto na Lei 7/2007, do 12 de abril, polo que se aproba o Estatuto básico do empregado público, no Decreto lexislativo 1/2008, do 13 de marzo, polo que se aproba o texto refundido da Lei da función pública de Galicia e demais normativa concordante, esta consellería

DISPÓN:

Primeiro. Convocar os/as funcionarios/as que figuran nas ordes do 30 de marzo de 2010, do 8 de marzo de 2013 e do 28 de maio de 2014 e que estean actualmente en destino provisional, ao acto de elección de destino definitivo que terá lugar no salón de actos número 2 (pequeno) da Vicepresidencia e Consellería de Presidencia, Administracións Públicas e Xustiza (Edificio Administrativo San Caetano, s/n, Santiago de Compostela) o día 28 de outubro de 2014, ás 10.30 horas.

Segundo. Os/as funcionarios/as convocados/as poderán elixir entre os postos que se relacionan no anexo desta orde segundo a orde acadada no respectivo proceso selectivo, sempre que reúnan as condicións exixidas nel.

Os/as funcionarios/as nomeados/as pola Orde do 30 de marzo de 2010 terán preferencia sobre os/as funcionarios/as nomeados/as pola Orde do 8 de marzo de 2013 e estes sobre os/as funcionarios/as nomeados/as pola Orde do 28 de maio de 2014.

Terceiro. Os/as funcionarios/as deberán ir provistos/as de DNI ou outro documento que acredite fidedignamente a súa identidade; no caso de non comparecer persoalmente poderán ser representados/as por terceiras persoas con poder notarial suficiente.

Cuarto. Aos/as funcionarios/as que non comparezan persoalmente ou por medio de representantes seranlles adxudicadas en destino definitivo as prazas que lles correspondan atendendo á orde de publicación destas e ao número obtido no respectivo proceso selectivo, unha vez concluído o proceso de adxudicación das prazas aos/as funcionarios/as presentes ou representados/as en cada proceso selectivo, entre as que queden sen adxudicar.

Quinto. Os/as funcionarios/as que soliciten ser declarados/as en excedencia voluntaria por prestación de servizos no sector público ou por interese particular reguladas no artigo 57.1 do Decreto lexislativo 1/2008, do 13 de marzo –redacción dada polo artigo 25 da Lei 15/2010, do 28 de decembro– deberán presentarse ao chamamento cun certificado do/da responsable da súa unidade de persoal en que conste a condición con que presta servizos na actualidade en documento orixinal ou fotocopia debidamente compulsada.

Sexto. Contra esta orde, que pon fin á vía administrativa, poderase presentar recurso potestativo de reposición ante a conselleira de Facenda no prazo dun mes contado desde o día seguinte ao da publicación desta orde no Diario Oficial de Galicia, ou directamente recurso contencioso-administrativo, no prazo de dous meses contados desde esa mesma data ante o Xulgado do Contencioso-Administrativo de Santiago de Compostela, conforme o disposto na Lei 29/1998, do 13 de xullo, reguladora da xurisdición contencioso-administrativa.

Santiago de Compostela, 15 de outubro de 2014

Elena Muñoz Fonteriz
Conselleira de Facenda

ANEXO