O Concello do Corgo remite documentación do expediente, para os efectos previstos na disposición adicional segunda.2, da Lei 9/2002, de ordenación urbanística e protección do medio rural de Galicia.

Analizada a documentación sinalada e vista a proposta subscrita pola Subdirección Xeral de Urbanismo, resulta:

I. Antecedentes.

a) Con data do 9 de novembro de 2010, esta Secretaría Xeral de Ordenación do Territorio e Urbanismo resolveu desfavorablemente sobre o proxecto de delimitación do NRT de Bergazo, datado en abril de 2010.

b) A Dirección Xeral do Patrimonio Cultural –DXPC– emitiou informe sobre o expediente de delimitación en datas 11 de xaneiro de 2011 e 18 de outubro de 2011 (desfavorable) e 11 de febreiro de 2014 favorable, condicionada á inclusión da igrexa e castro de Bergazo no contorno de protección do núcleo.

c) O Concello do Corgo carece de instrumento de planeamento xeral, rexéndose polas normas de aplicación directa da LOUG e, no que non se opón a estas, polas normas complementarias e subsidiarias de planeamento provincial aprobadas o 3 de abril de 1991.

II. Análise e consideracións.

a) Proponse a delimitación, como núcleo rural complexo, do asentamento poboacional de Bergazo, pertencente á parroquia de San Fiz de Bergazo, cunha superficie bruta aproximada de 3,98 ha, correspondendo ao tipos de núcleo rural histórico tradicional –en diante NRHT– e de núcleo rural común –NRC– unhas superficies netas aproximadas de 2,89 ha e 1,09 ha, respectivamente.

b) O proxecto recoñece as vías públicas existentes e determina os terreos edificables do asentamento, regulando as súas condicións de uso e edificación. Así mesmo, incorpora un catálogo no cal se inclúen dúas construcións singulares (mina de auga e alpendre tradicional) e o conxunto do núcleo. Non se identifican terreos destinados a usos dotacionais.

c) Trátase dun proxecto de iniciativa particular (promotores José Río Doval –DNI 76574524A– e Mª Ángeles Pereira López –DNI 33336485D–).

d) Compróbase que se cumpre o indicado polo informe da DXPC emitido pola DXPC o 11 de febreiro de 2014 e que se acredita o cumprimento dos requisitos establecidos pola disposición adicional segunda.2 da LOUG.

De acordo co punto 2 da disposición adicional segunda da LOUG, e co artigo 12.1.b) do Decreto 316/2009, do 4 de xuño, polo que se establece a estrutura orgánica da Consellería de Medio Ambiente, Territorio e Infraestruturas, a competencia para resolver sobre a aprobación definitiva dos expedientes de delimitación de solo de núcleos rurais correspóndelle á Secretaría Xeral de Ordenación do Territorio e Urbanismo.

III. Resolución.

Visto canto antecede, resolvo:

1. Aprobar definitivamente o proxecto de delimitación do solo de núcleo rural de Bergazo, da Parroquia de San Fiz de Bergazo, do Concello do Corgo.

2. Contra esta resolución cabe interpoñer recurso contencioso-administrativo ante o Tribunal Superior de Xustiza de Galicia, no prazo de dous meses, que se contarán desde o día seguinte ao da súa publicación, de conformidade co disposto nos artigos 10 e 46 da Lei 29/1998, do 13 de xullo, reguladora da xurisdición contencioso-administrativa.

3. Notifíquese ao concello e publíquese no Diario Oficial de Galicia.

Santiago de Compostela, 29 de setembro de 2014

Mª Encarnación Rivas Díaz
Secretaria xeral de Ordenación do Territorio e Urbanismo