Conforme os criterios reitores das bases de mobilidade voluntaria do persoal estatutario fixo, correspondentes ás categorías de persoal sanitario diplomado e de formación profesional e de persoal de xestión e servizos das institucións sanitarias de atención especializada do Servizo Galego de Saúde, aprobadas pola mesa sectorial o 23 de decembro de 2009, a Xerencia de Xestión Integrada de Santiago de Compostela, tras un proceso de negociación coa representación legal dos traballadores do Hospital da Barbanza, e con base nas competencias atribuídas polo Decreto 168/2010, do 7 de outubro, polo que se regula a estrutura organizativa de Xestión Integrada do Servizo Galego de Saúde, a Orde do 5 de xullo de 2012, sobre delegación de competencias en órganos centrais e periféricos do Servizo Galego de Saúde, o xerente de Xestión Integrada de Santiago de Compostela
RESOLVE:
Primeiro. Anunciar a convocatoria de mobilidade voluntaria do persoal fixo do cadro de persoal do Hospital da Barbanza das categorías de persoal sanitario (persoal de enfermaría e técnico especialista en coidados auxiliares de enfermaría).
Segundo. Ordenar a súa publicación no taboleiro de anuncios do Hospital da Barbanza, así como na intranet da Xerencia de Xestión Integrada de Santiago de Compostela, mediante Resolución do 23 de xullo de 2014.
A relación de prazas que se poden solicitar, así como as bases que rexerán a convocatoria publícanse como anexo I e anexo II á resolución, respectivamente.
A formalización das solicitudes de participación, así como o rexistro dos méritos para a súa posterior valoración, efectuarana as persoas concursantes a través do currículo do profesional habilitado (FIDES expediente), ao cal se accederá na forma que se indica no anexo III.
Contra esta resolución poderá interpoñerse recurso de alzada, perante a Dirección Xeral de Recursos Humanos do Servizo Galego de Saúde, no prazo dun mes contado a partir do día seguinte ao da súa publicación, nos termos dos artigos 114 e 115 da Lei 30/1992, do 26 de novembro, de réxime xurídico das administracións públicas e do procedemento administrativo común, segundo a redacción dada por Lei 4/1999, do 13 de xaneiro.
Santiago de Compostela, 23 de xullo de 2014
Luis Verde Remeseiro
Xerente de Xestión Integrada de Santiago de Compostela