Por Orde do 30 de outubro de 2012, autorízase temporalmente a apertura e funcionamento do centro privado estranxeiro O Castro International School, de Mos (Pontevedra), para impartir as ensinanzas de Nursery (3 anos de idade) ata o curso de Year 7 (12 anos de idade) do Currículo Nacional de Inglaterra e País de Gales, ensinanzas que corresponden co segundo ciclo da educación infantil e coa educación primaria do sistema educativo de España.
Con data do 8 de maio de 2014 o British Council certifica que, de acordo co informe de inspección, o centro docente reúne os requisitos do artigo 14 do Real decreto 806/1993, do 28 de maio, para unha autorización plena.
O representante da titularidade do devandito centro privado estranxeiro solicita a autorización definitiva para impartir as ensinanzas do sistema educativo británico a alumnado español e estranxeiro.
Polo que antecede, por proposta da Dirección Xeral de Centros e Recursos Humanos,
DISPOÑO:
Primeiro. Autorización
1. Conceder a autorización definitiva ao centro privado estranxeiro O Castro International School, para impartir as ensinanzas de Nursery (3 anos de idade) ata o curso de Year 7 (12 anos de idade) do Currículo Nacional de Inglaterra e País de Gales.
2. Os datos do centro son os que se detallan a seguir:
Denominación xenérica: centro privado estranxeiro.
Denominación específica: O Castro International School.
Código do centro: 36024835.
Titular: O Castro International School of Vigo, S.L.
Domicilio: Camiño de San Cosme nº 1.
Localidade: San Pedro de Cela.
Concello: Mos.
Provincia: Pontevedra.
Ensinanzas que se autorizan: Nursery (3 anos de idade) ata o curso de Year 7 (12 anos de idade) do Currículo Nacional de Inglaterra e País de Gales.
Alumnado: español e estranxeiro.
Número de postos escolares: 450.
Segundo. O centro deberá completar as ensinanzas autorizadas con ensinanzas de lingua castelá e literatura e de lingua galega e literatura, que deberán impartirse co mesmo deseño e horario establecidos nas normas da Comunidade Autónoma de Galicia, que regulan as ensinanzas correspondentes á educación infantil e primaria.
Así mesmo, o currículo de cultura española deberá desenvolver os contidos esenciais das áreas de coñecemento do Medio Natural, Social e Cultural, recollidos nas normas reguladoras das ensinanzas.
Terceiro. O profesorado que imparta as ensinanzas mencionadas no punto anterior deberá reunir os requisitos de titulación requiridos pola lexislación española para os niveis educativos correspondentes, e terá os dereitos e obrigas que determina o artigo 12 do Real decreto 806/1993, do 28 de maio, sobre réxime de centros docentes estranxeiros en España.
Cuarto. Esta orde dará lugar á correspondente inscrición no Rexistro de Centros da Comunidade Autónoma de Galicia.
Quinto. O centro queda obrigado ao cumprimento da normativa vixente e sometido á inspección educativa da Consellería de Cultura, Educación e Ordenación Universitaria, de conformidade co establecido no artigo 9 do Real decreto 806/1993, do 28 de maio, así como a solicitar unha nova autorización e inscrición no caso de que se produza calquera variación dos elementos e circunstancias que dan lugar a esta autorización.
Contra esta orde, que esgota a vía administrativa, as persoas interesadas poderán formular recurso potestativo de reposición ante esta consellería, no prazo dun mes, contado a partir do día seguinte ao da súa publicación no Diario Oficial de Galicia, segundo o disposto nos artigos 116 e 117 da Lei 30/1992, do 26 de novembro, de réxime xurídico das administracións públicas e do procedemento administrativo común, ou ben, directamente, o recurso contencioso-administrativo no prazo de dous meses desde a mesma data, ante a sala do contencioso-administrativo do Tribunal Superior de Xustiza de Galicia, de conformidade co artigo 46 da Lei 29/1998, do 13 de xullo, reguladora da xurisdición contencioso-administrativa.
Santiago de Compostela, 10 de xullo de 2014
Jesús Vázquez Abad
Conselleiro de Cultura, Educación e Ordenación Universitaria