Antecedentes de feito.

Primeiro. O 3 de febreiro de 2014, a Xefatura Territorial da Consellería de Medio Ambiente, Territorio e Infraestruturas en Pontevedra aprobou a resolución da renovación do Plan de aproveitamento específico da anguía na desembocadura do río Ulla para o ano 2014, publicada no DOG nº 33, do 18 de febreiro de 2014.

Segundo. Esta resolución recolle determinadas previsións relativas a este aproveitamento específico e, entre elas, prevé no anexo A a relación de embarcacións e membros participantes no Plan de aproveitamento da anguía no río Ulla para o ano 2014.

Terceiro. O Servizo de Planificación da Subdirección de Investigación e Apoio Científico-Técnico da Consellería do Medio Rural e do Mar propón, mediante informe do 7 de abril de 2014, determinadas modificacións relativas ao anexo A da Resolución do 3 de febreiro de 2014, con base na revisión dos antecedentes de plans anteriores. Estas modificacións que se propoñen non producen, en ningún caso, incremento no esforzo de pesca histórico no aproveitamento da anguía no río Ulla.

Fundamentos de dereito.

Primeiro. A normativa de aplicación para a resolución deste procedemento vén determinada polo Decreto 130/2011, do 9 de xuño, polo que se regula a pesca profesional da anguía nas augas continentais competencia da Comunidade Autónoma de Galicia, así como pola Lei 7/1992, do 24 de xullo, de pesca fluvial de Galicia, e polo Regulamento de ordenación da pesca fluvial e dos ecosistemas acuáticos continentais, aprobado polo Decreto 130/1997, do 14 de maio.

Segundo. O artigo 9 do Decreto 130/2011, do 9 de xuño, prevé que a resolución de renovación dun plan de aproveitamento específico de anguía corresponde ás xefaturas territoriais con competencia en materia de pesca fluvial. En consecuencia, a competencia para modificación dunha resolución de renovación nesta materia corresponde igualmente ao dito xefe territorial.

Visto o expediente e de acordo co exposto dítase a seguinte

RESOLUCIÓN:

Modifícase a Resolución do 3 de febreiro de 2014 pola que se aproba a renovación do Plan de aproveitamento específico da anguía na desembocadura do río Ulla para o ano 2014, cuxo anexo A queda redactado tal e como se recolle nesta resolución.

Esta resolución non esgota a vía administrativa e contra ela poderá interpor recurso de alzada ante o conselleiro de Medio Ambiente, Territorio e Infraestruturas no prazo dun mes contado a partir do día seguinte ao da súa publicación, de acordo co disposto na Lei 30/1992, do 26 de novembro, de réxime xurídico das administracións públicas e do procedemento administrativo común.

Pontevedra, 19 de maio de 2014

José Luis Díez Yáñez
Xefe territorial de Pontevedra

ANEXO A

Relación de embarcacións e membros participantes no
Plan de aproveitamento da anguía no río Ulla para o ano 2014