Dentro do Plan de actividades da Escola Galega de Administración Pública para o ano 2014 e de acordo coas funcións atribuídas pola Lei 4/1987, do 27 de maio, de creación da Escola, e pola Lei 10/1989, do 10 de xullo, de modificación da anterior, convócase, en colaboración coa Federación Galega de Municipios e Provincias (Fegamp) e coa Dirección Xeral de Administración Local, un curso monográfico titulado A reforma local a debate, conforme ás seguintes bases:
1. Obxectivos.
Analizar e contrastar o contido e as principais novidades incorporadas pola Lei 27/2013, do 27 de decembro, de racionalización e sustentabilidade da Administración local. Neste sentido, o curso monográfico convocado mediante esta resolución pretende, ademais, dar a coñecer os posibles efectos e incidencias que cabe esperar da aprobación da norma estatal sobre o funcionamento dos entes locais galegos e o seu goberno.
2. Contidos.
Serán tratados, entre outros, os seguintes temas:
– Novo marco competencial e suficiencia financeira.
– Implicacións da Lei de reforma local sobre o control interno das entidades locais.
– Perspectiva constitucional do principio de estabilidade orzamentaria. Que efectos está a ter a súa aplicación ás entidades locais?
– Galicia e a reforma local.
– A reestruturación do sector público local.
– A reordenación das competencias locais na Lei 27/2013.
– Garantía da transparencia administrativa e dereito a un bo goberno no ámbito local.
– O papel das deputacións na reforma da Administración local: autonomía provincial versus autonomía municipal.
– Consecuencias prácticas do novo modelo competencial local.
– Efectos da Lei 27/2013 sobre a planta municipal.
– O status funcionarial na Lei 27/2013 (con particular atención ao artigo 92 bis).
3. Destinatarios.
Persoal ao servizo da Administración galega e dos entes instrumentais da comunidade autónoma, cargos públicos e directivos á fronte destes, profesionais, universitarios e calquera outra persoa interesada en coñecer o novo réxime xurídico da planta municipal e os retos a que se enfronta.
4. Desenvolvemento.
Lugar: Escola Galega de Administración Pública (EGAP).
Datas e horario: 24 e 25 de abril, mañá e tarde.
Duración: 15 horas lectivas.
5. Número de prazas.
O número de prazas estará limitado pola capacidade do local.
6. Solicitudes.
As persoas interesadas deberán formalizar a súa inscrición a través da área de matrícula da web da EGAP: https://egap.xunta.es/matricula/
As persoas solicitantes poderán obter calquera outra información, das 8.30 ás 14.30 horas, chamando aos seguintes números: 981 54 62 41-981 54 62 39.
7. Prazo.
O prazo de inscrición estará aberto desde as 8.00 horas do día seguinte ao da publicación desta convocatoria ata as 00.00 horas do martes 22 de abril de 2014.
8. Modificacións.
A EGAP reserva para si a facultade de interpretar e de resolver as incidencias que poidan xurdir no desenvolvemento deste curso, así como a facultade de cancelalo se o número de solicitudes non xustificase a súa realización.
9. Certificado de asistencia.
Ao final do curso entregaráselles un certificado de asistencia a aquelas persoas inscritas que participaran asiduamente e sempre que a súa asistencia sexa igual ou superior ao 90 % das horas lectivas programadas. Neste documento aparecerán, de forma expresa, o contido, a data e o lugar de realización deste curso.
Santiago de Compostela, 28 de marzo de 2014
Sonia Rodríguez-Campos González
Directora da Escola Galega de Administración Pública