O Pleno do Concello de Vila de Cruces, en sesión realizada o 17 de febreiro de 2014, aprobou inicialmente o Plan xeral de ordenación municipal do Concello de Vila de Cruces redactado polo equipo redactor Adiu, S.L.P., presentado con data do 5 de novembro de 2013 e última redacción presentada o 21 de xaneiro de 2014.

De conformidade co preceptuado no artigo 85.2 da Lei 9/2002, do 30 de decembro, de ordenación urbanística e protección do medio rural de Galicia, e as súas posteriores modificacións, o plan aprobado inicialmente, con todos os documentos integrantes do expediente tramitado, incluído o informe de sustentabilidade ambiental, sométese ás consultas previstas no documento de referencia, e simultaneamente someterase ao trámite de información pública durante un prazo de dous meses, contados a partir da última publicación deste anuncio no Diario Oficial de Galicia e en dous dos xornais de maior difusión da provincia de Pontevedra: Faro de Vigo e La voz de Galicia. Durante esta fase de consulta e de exposición ao público, calquera interesado poderá consultar o expediente e, de ser o caso, formular as alegacións que xulguen oportunas.

De conformidade co disposto no artigo 77.2 da Lei 9/2002, do 30 de decembro, de ordenación urbanística e protección do medio rural de Galicia, acordouse suspender o outorgamento de licenzas naqueles ámbitos do territorio obxecto de planeamento no caso de que as novas determinacións supoñan a modificación da ordenación urbanística vixente. A duración da suspensión é de dous anos como máximo e, en todo caso, extinguirase coa aprobación definitiva. Determínanse como áreas afectadas pola suspensión de licenzas todo o territorio municipal excepto os ámbitos do Plan especial de reforma interior nº 1 PERI, Plan especial do Camballón e o Plan especial para a recuperación do poboado mineiro de Fontao. Poderán outorgarse licenzas en todos os ámbitos en que se cumpra coa normativa vixente e a que se encontra en tramitación e, en todo caso, coa máis restritiva das dúas.

O expediente completo poderase consultar no edificio do concello, de luns a venres e das 9.00 ás 14.00 horas.

Vila de Cruces, 26 de febreiro de 2014

Jesús Otero Varela
Alcalde