O 10 de febreiro de 2014, o Colexio Oficial de Psicoloxía de Galicia presentou recurso de reposición contra as bases reguladoras da convocatoria de selección para o posto de directora do Centro de Recuperación Integral de Mulleres que Sofren Violencia de Xénero. Mediante o devandito recurso solicítase a inclusión do título de psicoloxía como válido para a admisión ao proceso selectivo alegando, fundamentalmente, o seguinte:

Primeiro. Que, de acordo co Real decreto 1954/1994, do 30 de setembro, a licenciatura de Psicoloxía se integraba na rama de Ciencias Sociais e Xurídicas e, polo tanto, deberían ser admitidas as probas de selección.

Segundo. Que, con posterioridade, o Real decreto 1393/2007, do 29 de outubro, polo que se establece a ordenación das ensinanzas universitarias oficiais dispón no seu artigo 12 que os plans de estudos para a obtención do título de Grao serán elaborados polas universidades e verificados de acordo co establecido no propio real decreto, e que a universidade proporá a adscrición do correspondente título de graduado ou graduada a algunha das seguintes ramas de coñecemento: a) Artes e Humanidades; b) Ciencias; c) Ciencias da Saúde; d) Ciencias Sociais e Xurídicas; e) Enxeñaría e Arquitectura.

Terceiro. Que na mesma norma, a súa disposición adicional cuarta, relativa aos efectos dos títulos universitarios oficiais correspondentes á anterior ordenación, sinala que os títulos universitarios oficiais obtidos conforme a plans de estudo anteriores á entrada en vigor dese real decreto manterán todos os seus efectos académicos e, se é o caso, profesionais.

As mencionadas circunstancias, relativas á integración dos estudos de psicoloxía en distintas ramas de coñecemento, dependendo do momento, así como o feito de que cada universidade dispoña actualmente de liberdade para encadrar os estudos de psicoloxía entre as Ciencias da Saúde ou entre as Ciencias Sociais e Xurídicas, determinan que, por razóns de seguridade xurídica e de asegurar unha interpretación uniforme das bases, proceda á modificación das mesmas.

A dita modificación atópase na páxina web da Secretaría Xeral da Igualdade:

http://igualdade.xunta.es

Como consecuencia do anterior, ábrese un novo prazo de presentación de solicitudes que será de cinco (5) días hábiles contados desde o día seguinte ao da publicación desta orde para as persoas interesadas que estean en posesión da titulación en psicoloxía.

En relación coas solicitudes xa presentadas e excluídas provisionalmente con base unicamente no motivo da titulación de psicoloxía, a estimación do recurso anteriormente mencionado, conleva a revogación da indicada exclusión e a súa admisión sen máis trámite.

Santiago de Compostela, 10 de febreiro de 2014

Alfonso Rueda Valenzuela
Vicepresidente e conselleiro de Presidencia, Administracións Públicas e Xustiza