O Xurado Provincial de Clasificación de Montes Veciñais en Man Común de Ourense, en sesión do día 10 de decembro de 2013, en relación coa solicitude da comunidade propietaria dos montes veciñais en man común Comunal de Amoroce e Amoroce para que ambos os dous montes figuren como un só, denominado Comunal de Amoroce, pertencente á mesma comunidade que está integrada polos lugares de Carballeira, Goterre, Casvasco, A Granxa, Os Barreiros, Quintairos, Casal, Amorociña, Sampil, Rial, Mociños e As Fontiñas, no concello de Celanova (Ourense), examinada a documentación presentada e co informe favorable do Servizo de Montes, resolveu aceptar a solicitude, ordenando a súa publicación no Diario Oficial de Galicia, para os efectos do disposto na disposición transitoria décimo cuarta da Lei 7/2012, do 28 de xuño, de montes de Galicia.

Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense, no prazo dun mes ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta resolución, segundo o disposto na Lei 30/1992, do 26 de novembro, de réxime xurídico das administracións públicas e do procedemento administrativo común, así como na Lei 29/1998, do 13 de xullo, reguladora da xurisdición contencioso-administrativa.

Ourense, 17 de decembro de 2013

Yago Borrajo Sánchez
Presidente do Xurado Provincial de Clasificación de Montes Veciñais
en Man Común de Ourense