Outorgada a declaración de utilidade pública, que leva implícita a urxente ocupación dos bens e dereitos afectados polas instalacións da liña eléctrica aérea a 15/20 kV, cunha lonxitude de 696 m, con orixe no apoio existente da LMT MEL-712 subestación Melide-Boimil (expediente 7277) e final no centro de transformación que se instalará no lugar de Fornelos, no termo municipal de Boimorto (expediente 157/2011), por resolución desta xefatura territorial do 23 de maio de 2013, a favor da entidade beneficiaria Unión Fenosa Distribución, S.A. con enderezo na avenida de Arteixo, nº 171, 15007 da Coruña.

Esta xefatura territorial acorda sinalar o día 29 de outubro de 2013 para o levantamento das actas previas á ocupación, de conformidade cos artigos 52 da Lei de expropiación forzosa, do 16 de decembro de 1954, e 56 do seu regulamento, do 26 de abril de 1957, nas cales se describirán os bens ou dereitos expropiables e de imposición de servidume de paso de enerxía eléctrica contidos na relación de predios que se expón xunto con esta resolución no taboleiro de edictos do Concello de Boimorto, deducida da que se someteu a información pública no DOG, BOP e no xornal El Correo Gallego dos días 18.7.2011, 11.7.2011 e 13.7.2011, respectivamente, acto a que deberán concorrer os propietarios propostos dos predios afectados, aos cales se lles practicará notificación individual sinalándoselles os horarios de toma de datos sobre o terreo e do levantamento efectivo das actas nas oficinas da referida Casa Consistorial.

Esta publicación realizarase igualmente para os efectos do artigo 59.4 da Lei 30/1992, do 26 de novembro, de réxime xurídico das administracións públicas e do procedemento administrativo común, cando os titulares dos predios propostos sexan descoñecidos ou se ignore o lugar de notificación; e así dirixir ao Ministerio Fiscal as dilixencias que se produzan destes, de conformidade co artigo 5 da devandita Lei de expropiación forzosa.

A Coruña, 9 de setembro de 2013

Susana Vázquez Romero
Xefa territorial da Coruña