O Pleno do Concello de Baltar, en sesión extraordinaria do 22 de agosto de 2013, conforme o disposto no artigo 85 da Lei 9/2002, do 30 de decembro, de ordenación urbanística e protección do medio rural de Galicia, e co disposto nos artigos 11 do Real decreto lexislativo 2/2008, do 20 de xuño, polo que se aproba o texto refundido da Lei do solo, e o artigo 7 da vixente Lei 6/2007, de medidas urxentes en materia de ordenación do territorio e do litoral de Galicia, acordou, por maioría:

1. Aprobar inicialmente o Plan xeral de ordenación municipal do Concello de Baltar, elaborado por Abante Arquitectura, S.L.P., no cal se inclúe o informe de sustentabilidade ambiental (ISA).

2. Someter o dito plan xeral a información pública, por un prazo de dous meses, efectuando a publicación dos anuncios correspondentes no Diario Oficial de Galicia e en dous dos xornais de maior difusión da provincia (La Región e Faro de Vigo). Para estes efectos, o período de información pública rematará transcorridos os dous meses desde o día seguinte ao da publicación do anuncio no Diario Oficial de Galicia. Durante este, todas as persoas interesadas poderán facer uso do seu dereito a consultar os documentos nas dependencias do Concello de Baltar, e presentar as alegacións escritas oportunas en horario de oficina.

Simultaneamente ao trámite de información pública, o concello solicitaralles ás administracións públicas competentes os informes sectoriais que resulten necesarios, que deberán ser emitidos no prazo máximo dun mes, agás que a lexislación sectorial sinale outro prazo.

Así mesmo, e durante o prazo de información pública, daráselles audiencia aos municipios limítrofes.

Os documentos do PXOM que inclúe o informe de sustentabilidade ambiental (ISA) someterase ás consultas previstas no documento de referencia para a avaliación ambiental estratéxica (AAE) do Plan xeral de ordenación municipal do Concello de Baltar. A fase de consultas realizarase simultaneamente coa de información pública exixida pola normativa urbanística durante o prazo de dous meses, en que o PXOM aprobado inicialmente será exposto para o seu exame e formulación de observacións, segundo o artigo 7.5º da Lei 6/2007, de medidas urxentes en materia de ordenación do territorio e litoral de Galicia.

3. De conformidade co sinalado no artigo 77 da Lei 9/2002, do 30 de decembro, de ordenación urbanística e protección do medio rural de Galicia, o acordo de aprobación inicial determina por si só a suspensión do procedemento de outorgamento de licenzas, nos ámbitos que se relacionan nos parágrafos seguintes. Esta suspensión terá unha duración máxima de dous anos e extinguirase, en todo caso, coa aprobación definitiva do planeamento:

a) En todas as zonas afectadas por sistemas xerais ou locais de vías, infraestrutruras, equipamentos ou espazos libres, en calquera clase de solo, agás naquelas zonas que sirvan para a propia execución destes.

b) Nos núcleos rurais suspenderase só naquelas zonas en que non se poidan cumprir as dúas ordenacións ou normativas simultaneamente (Normas Complementarias e Subsidiarias de Planeamento (NSP) da provincia de Ourense vixentes e PXOM).

c) No ámbito de solo urbanizable (SURB-ND_I-1).

d) No solo rústico só se suspenderán as licenzas no caso xeral do punto a) anterior (zonas afectadas por sistemas xerais ou locais de vías, infraestruturas, equipamentos ou espazos libres) e naquelas zonas en que non se poidan cumprir as dúas ordenacións ou normativas simultaneamente (NSP vixentes e PXOM).

Baltar, 23 de agosto de 2013

José Antonio Feijóo Alonso
Alcalde