Ponse en coñecemento de todos os interesados na concentración parcelaria da zona de Vilatuxe (Lalín, Pontevedra), declarada de utilidade pública e urxente execución polo Decreto 258/2001, do 20 de setembro (DOG núm 198, do 11 de outubro), o seguinte:

Primeiro. Con data do 13 de xuño de 2013 o director xeral de Desenvolvemento Rural aprobou o acordo de concentración parcelaria da zona de Vilatuxe (Lalín, Pontevedra), logo de introducir no proxecto as modificacións oportunas á vista dos resultados da enquisa deste último.

Segundo. O acordo de concentración será notificado individualmente a cada un dos afectados e estará exposto ao público na casa do concello de Lalín, durante o período de interposición de recursos. Os documentos que se poden examinar no dito concello refírense aos predios de substitución onde constan as situacións xurídicas derivadas das parcelas de procedencia, as fichas de atribucións, os planos e outros.

Terceiro. No prazo de trinta días, contados desde o seguinte ao da notificación persoal ou publicación substitutiva, poderán interpoñer recurso de alzada ante o conselleiro do Medio Rural e do Mar, podendo os recorrentes presentar os recursos no Rexistro Único do Edificio Administrativo de Pontevedra –rúa Fernández Ladreda, 43, Pontevedra–, no Rexistro Xeral da consellería –Edificio Administrativo San Caetano, s/n, Santiago de Compostela– ou en calquera das dependencias a que fai referencia o artigo 38 da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro, por si mesmos o por representación.

Pontevedra, 5 de xullo de 2013

Miguel Ángel Pérez Dubois
Xefe territorial de Pontevedra