En decembro de 2012 entrou na Dirección Xeral de Patrimonio Cultural certificado do acordo do Pleno do Concello de Mondariz, do 24 de novembro de 2012, no cal se insta á inclusión do castelo de Sobroso no Rexistro de Bens de Interese Cultural de Galicia.

Mediante o Decreto do 22 de abril de 1949, sobre protección dos castelos españois, todos os castelos de España, calquera que sexa o seu estado de ruína, quedan baixo a protección do Estado, e no seu artigo cuarto establécese que se proceda a redactar un inventario documental e gráfico o máis detallado posible dos castelos existentes en España.

A disposición adicional segunda da Lei 16/1985, do 25 de xuño, do patrimonio histórico español, establece que se consideran de interese cultural e quedan sometidos ao réxime previsto nela os bens a que se contraen os decretos 571/1963 e 499/1973, do 22 de abril de 1949. Pola súa parte, a disposición adicional primeira da Lei 8/1995, do 30 de outubro, de patrimonio cultural de Galicia, dispón que todos aqueles bens mobles e inmobles sitos no ámbito territorial da Comunidade Autónoma de Galicia que fosen declarados de interese cultural con anterioridade á entrada en vigor desta lei pasarán a ter a consideración de bens de interese cultural e quedarán sometidos ao mesmo réxime xurídico de protección aplicable a estes. Por tanto, en virtude do disposto nesas disposicións legais, conclúese que o castelo medieval de Sobroso, localizado en Vilasobroso, no concello de Mondariz, xa posúe a condición de ben de interese cultural.

En consecuencia, vista a solicitude do concello de Mondariz, o informe técnico do Servizo de Planeamento e Inventario e o pronunciamento favorable da Comisión Territorial de Patrimonio Histórico de Pontevedra, emitido na súa reunión do 9 de abril de 2013, en exercicio das competencias que esta dirección xeral ten recoñecidas no artigo 13 do Decreto 4/2013, do 10 de xaneiro, que desenvolve a estrutura orgánica da Consellería de Cultura, Educación e Ordenación Universitaria,

ACORDO:

Primeiro. Ordenar a inscrición do castelo de Sobroso, situado no concello de Mondariz, no Rexistro de Bens de Interese Cultural, segundo o disposto no artigo 14.1 da Lei 8/1995, do 30 de outubro, do patrimonio cultural de Galicia.

Segundo. Publicar o presente acordo no Diario Oficicial de Galicia para xeral coñecemento e notificalo ao seu titular e ao Concello de Mondariz.

Santiago de Compostela, 17 de xuño de 2013

Maria Carmen Martinez Ínsua
Directora Xeral do Patrimonio Cultural