O Regulamento de planificación hidrolóxica, aprobado polo Real decreto 907/2007, do 6 de xullo, regula, no seu título terceiro, o procedemento de seguimento e revisión dos plans hidrolóxicos, que serán realizados polos organismos de bacía correspondentes ou pola Administración hidráulica competente, nas bacías comprendidas integramente no ámbito territorial da comunidade autónoma.
A planificación hidrolóxica ten como obxectivos xerais acadar o bo estado e a axeitada protección das augas das demarcacións hidrográficas, a satisfacción das demandas de auga, o equilibrio e a harmonización do desenvolvemento rexional e sectorial, incrementando as dispoñibilidades do recurso, protexendo a súa calidade, economizando o seu emprego e racionalizando os seus usos en harmonía co ambiente e cos demais recursos naturais.
De acordo co establecido na Directiva 2000/60/CE, do Parlamento Europeo e do Consello, do 23 de outubro de 2000, pola que se establece un marco comunitario de actuación no ámbito da política de augas, de acordo co establecido no Regulamento de planificación hidrolóxica citado, e segundo o establecido no artigo 77 da Lei 9/2010, do 4 de novembro, de augas de Galicia, que recolle as competencias en materia de planificación hidrolóxica da Demarcación Hidrográfica de Galicia-Costa,
RESOLVO:
1º. Poñer en marcha os traballos do segundo ciclo de planificación hidrolóxica 2015-2021, iniciando o proceso de revisión do Plan Hidrolóxico da Demarcación Hidrográfica de Galicia-Costa.
2º. Anunciar a apertura do período de consulta pública dos documentos iniciais do segundo ciclo de planificación hidrolóxica 2015-2021 da Demarcación Hidrográfica de Galicia-Costa, que son: programa, calendario, estudo xeral da demarcación e fórmulas de consulta.
Para estes efectos, os citados documentos poderanse consultar desde o día seguinte ao da publicación deste anuncio no Diario Oficial de Galicia e polo período de seis meses, nas oficinas dos servizos territoriais e dos servizos centrais de Augas de Galicia e na páxina web deste organismo de conca: http://augasdegalicia.xunta.es
A modalidade de participación neste proceso de consulta pública será por escrito, e deberanse dirixir as instancias ao director de Augas de Galicia, con enderezo na praza de Camilo Díaz Baliño, 7-9,15781 Santiago de Compostela.
Santiago de Compostela, 16 de maio de 2013
Francisco Menéndez Iglesias
Director de Augas de Galicia