A disposición derradeira primeira da Orde do 1 de febreiro de 2013 pola que se regula a aplicación dos pagamentos directos á agricultura e á gandaría e das axudas ao desenvolvemento rural para a utilización sustentable das terras agrícolas no ano 2013 faculta a directora do Fondo Galego de Garantía Agraria, no ámbito das súas competencias, para ditar as instrucións precisas para a execución desta orde.

Mediante a Orde 690/2013, do 25 de abril, do Ministerio de Agricultura, Alimentación e Medio Ambiente, amplíase o prazo de presentación da solicitude única do artigo 87.2 do Real decreto 202/2012, do 23 de xaneiro, sobre a aplicación a partir do ano 2012 dos pagamentos directos á agricultura e á gandaría, que establece que a solicitude única se deberá presentar no período comprendido entre o día 1 de febreiro e o 30 de abril, ampliando para o ano 2013 o dito prazo ata o 10 de maio de 2013, inclusive. Este novo prazo establécese para garantir así a obtención de todos os datos precisos e desta forma asegurar unha correcta xestión das axudas.

Polo tanto, o prazo para a presentación da solicitude única de axudas PAC/DR 2013 empezou o día 1 de febreiro e finalizará o día 10 de maio de 2013, inclusive.

Santiago de Compostela, 30 de abril de 2013

Patricia Ulloa Alonso
Directora do Fondo Galego de Garantía Agraria