O Pleno da corporación, na sesión extraordinaria que tivo lugar o día 29 de novembro de 2012, adoptou entre outros o seguinte acordo:
a) Estimar parcialmente a alegación formulada por María Dolores Lista Ameneiro no sentido de rectificar as zonas comúns e recoller o resío que se indica na alegación dentro da parcela 671-B2, pero unicamente con 22 metros máis, posto que os outros 15 se corresponden co camiño público da fonte.
b) Rexeitar a alegación formulada por María Consuelo Tarrío Tojo ao non achegar título acreditativo de propiedade da parcela 673, que deberá figurar a nome de propietario descoñecido.
c) Aprobar definitivamente o estudo de detalle do polígono 29 do Plan xeral, redactado polo arquitecto Julio Vázquez y Asociados e promovido por Santiago e Purificación Vázquez Costoya, presentado con data 13 de novembro de 2012 e que xa recolle no novo plano ED3 o resultado da estimación parcial da alegación formulada por María Dolores Lista Ameneiro, á cal se fixo referencia na anterior letra a).
O presente acordo notificaráselles persoalmente aos interesados e publicarase no Diario Oficial de Galicia e no Boletín Oficial da provincia, no cal se inserirá, así mesmo, a normativa urbanística aprobada. Ademais, o acordo comunicaráselle á Consellería de Medio Ambiente, Territorio e Infraestruturas, á cal se remitirán dous exemplares dilixenciados do documento definitivamente aprobado.
O acto de aprobación definitiva do citado estudo de detalle foi comunicado á Consellería de Medio Ambiente, Territorio e Infraestruturas con data 7 de decembro de 2012, en cumprimento do disposto polo artigo 92.3 da Lei 9/2002, do 30 de decembro, de ordenación urbanística e protección do medio rural de Galicia (LOUG).
Contra o acordo de aprobación definitiva do citado estudo de detalle poderase interpor directamente recurso contencioso-administrativo ante o Tribunal Superior de Xustiza de Galicia no prazo de dous meses, contados a partir do día seguinte ao da publicación deste anuncio.
Santiago de Compostela, 7 de decembro de 2012
Ángel Currás Fernández
Alcalde