Mediante o Decreto 202/2012, do 18 de outubro, creouse a Axencia Tributaria de Galicia e aprobouse o seu estatuto. A Axencia Tributaria de Galicia é unha axencia pública autonómica das previstas e reguladas na Lei 16/2010, do 17 de decembro, de organización e funcionamento da Administración xeral e do sector público autonómico de Galicia.
A disposición adicional primeira do citado decreto refírese á constitución da Axencia Tributaria de Galicia, momento separado da súa creación, unida á aprobación dos seus estatutos, e do seu inicio de actividade, ligado ao exercicio das súas funcións.
A constitución da Axencia Tributaria de Galicia prodúcese coa realización da sesión constitutiva do seu Consello Reitor, órgano colexiado de goberno a que corresponde establecer as directrices de actuación, de acordo coas emanadas da consellería competente en materia de facenda.
O Consello Reitor está integrado pola Presidencia, que corresponde á conselleira de Facenda, a Vicepresidencia, que exercerá a persoa titular da Dirección da Axencia, e seis vogais. Os membros do Consello Reitor son nomeados pola persoa titular da consellería competente en materia de facenda.
Por outra banda, na presente orde disponse que as funcións asignadas á Dirección da Axencia Tributaria de Galicia sexan exercidas pola persoa titular da Dirección Xeral de Tributos temporalmente e ata que se produza o nomeamento do seu titular.
Por todo isto, en virtude das atribucións que me confire a Lei 1/1983, do 22 de febreiro, de normas reguladoras da Xunta e da súa Presidencia,
DISPOÑO:
Artigo 1
Noméanse vogais titulares, e os seus correspondentes suplentes, do Consello Reitor da Axencia Tributaria de Galicia as seguintes persoas:
– Vogal titular: María del Socorro Martín Hierro, secretaria xeral técnica e do Patrimonio.
– Vogal suplente: Mª Ángeles Vidal Ruiz, subdirectora xeral de Apoio Técnico-Xurídico.
– Vogal titular: Miguel Corgos López-Prado, director xeral de Planificación e Orzamentos.
– Vogal suplente: Joaquín Caballero Miranda, subdirector xeral de Recursos e Ánalise Orzamentaria.
– Vogal titular: Manuel Galdo Pérez, director xeral de Política Financeira e Tesouro.
– Vogal suplente: Eusebio Martínez Santamarina, subdirector xeral do Tesouro.
– Vogal titular: José María Barreiro Díaz, director xeral de Función Pública.
– Vogal suplente: María Luisa Cardesín Díaz, subdirectora xeral de Provisión de Postos e Selección de Persoal.
– Vogal titular: Almudena Chacón Pichel, interventora xeral da Comunidade Autónoma.
– Vogal suplente: Aránzazu Portabales Santomé, subdirectora xeral de Fiscalización e Control Interno.
– Vogal titular: Mauro Fernández Dabouza, director xeral do Centro Informático para a Xestión Tributaria, Económico-Financeira e Contable.
– Vogal suplente: Germán Ferreiro Vilariño, xefe da División de Desenvolvemento de Sistemas de Información.
Artigo 2
Encoméndase temporalmente ao director xeral de Tributos da Consellería de Facenda o exercicio das funcións asignadas á Dirección da Axencia Tributaria de Galicia, ata o nomeamento da persoa titular da Dirección desta entidade.
Santiago de Compostela, 11 de decembro de 2012
Elena Muñoz Fonteriz
Conselleira de Facenda