O Consello de Dirección do Igape, na súa xuntanza do 13 de febreiro de 2012, aprobou o texto das bases reguladoras do programa do Igape de bolsas formativas para a realización de proxectos de mellora das pemes galegas, cofinanciadas polo Fondo Social Europeo, no marco do programa operativo FSE Galicia 2007-2013.

As ditas bases fixéronse públicas mediante Resolución do 1 de xuño de 2012 (DOG nº 111, do 12 de xuño).

O funcionamento dos grupos de traballo do Igape coas organizacións clúster galegas e o compromiso do Igape co apoio ao crecemento e consolidación temperá de empresas de nova creación motivan a formulación de axustes nos criterios de solvencia que as entidades colaboradoras do programa deben cumprir, co obxectivo de facilitar que estes dous colectivos poidan acceder á condición de entidade colaboradora.

O Consello de Dirección do Igape, na súa xuntanza do 31 de xullo de 2012, acordou a modificación das bases reguladoras do programa do Igape de bolsas formativas para a realización de proxectos de mellora das pemes galegas, cofinanciadas polo Fondo Social Europeo, no marco do programa operativo FSE Galicia 2007-2013.

Por todo o anterior e en virtude das facultades que teño conferidas

RESOLVO:

Primeiro. Publicar a modificación das bases reguladoras do programa do Igape de bolsas formativas para a realización de proxectos de mellora das pemes galegas, cofinanciadas polo Fondo Social Europeo, no marco do programa operativo FSE Galicia 2007-2013, no seguinte sentido:

– Engádese o seguinte punto ao artigo 6. Entidades colaboradoras:

«6.3. Os clústers galegos legalmente constituídos e as empresas cuxa data de constitución teña unha antigüidade inferior a dous anos na data de publicación da convocatoria de bolsas para a que van acoller bolseiros eximiranse do requisito de solvencia técnica relativa á experiencia de catro anos (deben cumprir o resto de requisitos de solvencia técnica), así como dos requisitos de solvencia económica».

Segundo. Esta resolución entrará en vigor o día da súa publicación no Diario Oficial de Galicia.

Santiago de Compostela, 28 de setembro de 2012

Javier Aguilera Navarro
Director xeral do Instituto Galego de Promoción Económica