A teor do previsto no artigo 5 da Lei 4/1994, do 14 de setembro, de estradas de Galicia, os cambios de titularidade das estradas incluídas nas redes dependentes da Comunidade Autónoma e das entidades locais deberán ser aprobados por decreto da Xunta de Galicia, por proposta da consellería competente en materia de estradas e logo do acordo entre as administracións afectadas.
A Axencia Galega de Infraestruturas, de acordo co informe emitido polos servizos competentes, formulou a proposta favorable á transferencia de titularidade do treito entre Portomouro (intersección coa estrada AC-453 Roxos-Portomouro) e Santa Comba (intersección coa estrada AC-400 Sigrás-Muros) da estrada provincial CP-0701, de Santiago de Compostela a Santa Comba, a prol da Comunidade Autónoma de Galicia.
A Axencia Galega de Infraestruturas e a Deputación Provincial da Coruña, como administracións afectadas, acordaron a transferencia da titularidade do treito da estrada CP-0701 indicado no parágrafo anterior.
De conformidade co anteriormente exposto, por proposta do conselleiro de Medio Ambiente, Territorio e Infraestruturas e logo de deliberación do Consello da Xunta de Galicia na súa reunión do día vinte e sete de setembro de dous mil doce,
DISPOÑO:
Artigo 1
Apróbase o cambio de titularidade a prol da Comunidade Autónoma de Galicia do treito entre Portomouro (intersección coa estrada AC-453 Roxos-Portomouro) e Santa Comba (intersección coa estrada AC-400 Sigrás-Muros) da estrada provincial CP-0701, de Santiago de Compostela a Santa Comba.
Artigo 2
En aplicación do artigo 4 da Lei 4/1994, do 14 de setembro, de estradas de Galicia, a Xunta de Galicia deberá incorporar ao seu plan de estradas a vía a que se refire este decreto.
Artigo 3
A entrega da vía formalizarase no prazo dos dous meses seguintes á publicación deste decreto no Diario Oficial de Galicia, mediante a sinatura da correspondente acta de entrega.
Artigo 4
Corresponderanlle á Comunidade Autónoma de Galicia, a partir da formalización da entrega, todas as actividades de xestión, mantemento, conservación e explotación da vía, así como o exercicio das funcións de disciplina viaria e calquera outra que puidese corresponderlle como nova Administración titular da estrada.
Disposición derradeira
Este decreto producirá efectos desde o día seguinte ao da súa publicación no Diario Oficial de Galicia.
Santiago de Compostela, vinte e sete de setembro de dous mil doce.
Alberto Núñez Feijóo
Presidente
Agustín Hernández-Fernández de Rojas
Conselleiro de Medio Ambiente, Territorio e Infraestruturas
