A Xunta Electoral de Galicia, na súa sesión do día 30 de setembro de 2012, tomou coñecemento dos plans de cobertura informativa elaborados pola corporación RTVE e a CRTVG para as eleccións ao Parlamento de Galicia do 21 de outubro de 2012, de conformidade co disposto no artigo 66 da Lei orgánica do réxime electoral xeral (LOREX) e na Instrución 4/2011, do 24 de marzo, da Xunta Electoral Central, de interpretación do artigo 66 da LOREX, no relativo ás garantías de respecto aos principios de pluralismo, igualdade, proporcionalidade e neutralidade informativa polos medios de comunicación en período electoral. Os plans atópanse na Secretaría da Xunta Electoral de Galicia, no horario de rexistro, á disposición dos representantes xerais das formacións políticas acreditados ante a devandita Xunta Electoral co obxecto de que, ata as 12.00 horas do martes 2 de outubro de 2012, poidan presentar os recursos que consideren pertinentes, de conformidade co disposto no punto quinto da devandita instrución.
Os recursos formulados en tempo e forma estarán á disposición das formacións políticas interesadas na Secretaría da Xunta Electoral para efectos de que poidan formular alegacións ata o mércores 3 de outubro de 2012, ás 10.30 horas.
O presente acordo publicarase no Diario Oficial de Galicia en virtude do disposto no artigo 18.6 da LOREX e no punto quinto da referida Instrución 4/2011.
A Coruña, 30 de setembro de 2012
Miguel Ángel Cadenas Sobreira
Presidente da Xunta Electoral de Galicia