O texto refundido da Lei de contratos do sector público (en diante TRLCSP), aprobado polo Real decreto lexislativo 3/2011, do 14 de novembro, establece no seu artigo 320 que, salvo no caso en que a competencia para contratar corresponda a unha xunta de contratación, os órganos de contratación estarán asistidos por unha mesa de contratación, que será o órgano competente para a valoración das ofertas nos procedementos abertos e restrinxidos e nos procedementos negociados con publicidade a que se refire o artigo 177.1 do mesmo texto legal. Igualmente, determina a estrutura e composición da mesa, así como os requisitos que debe cumprir cada un dos seus membros. No artigo 321 do mesmo texto configúranse os membros que integran este órgano nos supostos en que deba constituírse a mesa especial de diálogo competitivo.

O vixente Real decreto 817/2009, do 8 de maio, determina nos seus artigos 21, 22 e 23, respectivamente, a composición e funcións das mesas de contratación e da mesa de diálogo competitivo e a obrigatoriedade de publicar a súa composición no diario oficial da Administración autonómica se se trata dunha mesa permanente ou se lle atribúen funcións para unha pluralidade de contratos.

En consecuencia, de conformidade co previsto no artigo 320.3 do TRLCSP, esta xerencia, actuando como órgano de contratación en virtude das competencias delegadas no artigo 5 da Orde da Consellería de Sanidade, do 15 de xuño de 2009, sobre delegación de competencias en órganos centrais e periféricos do Sergas e en aplicación do previsto nos artigos 320 do TRLCSP e 21.4 do Real decreto 817/2009, do 8 de maio,

ACORDA:

A constitución, con carácter permanente, da mesa de vontratación do Complexo Hospitalario Universitario de Vigo, coas funcións que se lle asignan no artigo 22 de devandito real decreto, e cuxa composición se adecuará á designación de membros que nos puntos seguintes se reflicte.

Primeiro. Composición da mesa de contratación

A mesa de contratación estará constituída polos seguintes membros:

1. Presidente:

Director de Xestión e Servizos Xerais, o cal será substituído, en caso de vacante, ausencia ou enfermidade, por un subdirector de Xestión e, no seu defecto, polo vogal da mesa de maior xerarquía, antigüidade e idade, por esta orde, sen que en ningún caso poida recaer a presidencia, nin no letrado do Servizo Xurídico nin no interventor delegado, que en todo caso actuarán como vocais.

2. Vogais:

Letrado adscrito á Asesoría Xurídica Provincial.

Interventor delegado da Intervención Territorial da Consellería de Facenda.

Un subdirector de Xestión e Servizos Xerais.

Un técnico da función administrativa, adscrito ao Servizo de Contratación.

3. Secretario: o titular da xefatura do Servizo de Contratación Administrativa.

4. Todos os membros da mesa terán voz e voto, a excepción do secretario, que terá voz e non voto.

5. Cando a natureza dos asuntos o requira, a presidencia poderá solicitar a incorporación á mesa, de cantos asesores especializados e persoal técnico xulgue conveniente e poderá tamén solicitar cantos informes considere necesarios. Os asesores e persoal técnico actuarán con voz pero sen voto, sen que teñan a consideración de membros da mesa nin os seus informes a vinculen, excepto os emitidos polo Comité de Expertos

Segundo. Normas de funcionamento

As funcións da mesa de contratación e da mesa especial do diálogo competitivo correspóndense, respectivamente, coas relacionadas nos artigos 22 e 23 do Real decreto 817/2009, do 8 de maio, segundo se trate dun procedemento aberto, restrinxido, negociado ou de diálogo competitivo.

A mesa de contratación reunirase, logo de convocatoria do secretario, efectuada en nome de quen exerza a presidencia. Para a súa válida constitución, requirirase a presenza do presidente e secretario, ou dos que o substitúan, e da metade polo menos dos seus membros. En todo caso, será precisa a asistencia dos dous vogais que teñan atribuídas as funcións correspondentes ao asesoramento xurídico e o control económico-orzamentario do órgano de contratación ou quen os substitúan.

En ningún caso os membros da mesa con dereito a voto poderán absterse nas votacións que, para a correspondente toma de decisións, poidan celebrarse no seu seo.

Cando deban valorarse criterios sometidos a xuízos de valor cuxa ponderación sexa superior aos criterios de avaliación automática, deberá constituírse un comité de expertos ao que corresponderá realizar a valoración das ofertas conforme os criterios subxectivos que correspondan, ou ben encomendar esta avaliación a un organismo técnico especializado.

Os membros do comité de expertos, cuxo número non será inferior a tres, serán designados polo órgano de contratación, sen que formen parte nin se integren como compoñentes da mesa. No entanto, o informe de valoración que emita será vinculante para a mesa.

A mesa de contratación, como órgano colexiado asesor do órgano de contratación, elevará a este a proposta de adxudicación que considere máis vantaxosa e adecuada.

Nos supostos en que se aplique o procedemento de diálogo competitivo, a mesa de contratación constituirase de forma especial e estará composta polos mesmos membros da mesa permanente de contratación, máis as persoas que designe o órgano de contratación que, nun número igual ou superior a tres e non representando menos da terceira parte dos membros da mesa, se considere oportuno que se incorporen ao órgano colexiado como persoas con competencia técnica na materia a que se refire a licitación.

Os mencionados membros que se incorporen á mesa de contratación formarán parte da mesa de diálogo competitivo como membros con voz e voto.

Terceiro. Réxime xurídico

A mesa de contratación, como órgano colexiado, rexerase nos seus procedementos, ademais de pola normativa específica de contratación administrativa, polo establecido no capítulo II, título II, da Lei 30/1992, do 26 de novembro, de réxime xurídico das administracións públicas e do procedemento administrativo común.

Cuarto. Derrogación

Queda sen efecto a resolución ditada por esta xerencia o 13 de xullo de 2009 (DOG nº 154, do 7 de agosto).

Quinto. Publicación e data de efectos

A presente resolución entrará en vigor o día seguinte ao da súa publicación no Diario Oficial de Galicia.

Vigo, 4 de xullo de 2012

P.D. (artigo 5 da Orde 15.6.2009, DOG nº 119, do 19 de xuño)
Francisco Soriano Paredes
Xerente do Complexo Hospitalario Universitario de Vigo