Por Resolución da Axencia Galega de Infraestruturas do 24 de abril de 2012 aprobouse provisionalmente o estudo informativo e estudo de impacto ambiental da obra de conexión Porto Seco Monforte coa LU-546. Clave LU/09/256.00.
Con esta nova vía preténdese establecer unha conexión directa entre a vía de alta capacidade CG-2.1 e o parque empresarial do Porto Seco. Así mesmo, esta vía servirá para dar continuidade á conexión do Porto Seco coa N-120, creando deste xeito un enlace directo entre esta vía e a CG-2.1 que evite a necesidade de acceder ao núcleo de Monforte de Lemos.
A Xunta de Galicia ten como obxectivo con este novo proxecto, contemplado dentro do Programa de Vías Estruturantes do Plan de Mobilidade e Ordenación Viaria Estratéxica (MOVE), a obtención da alternativa máis conveniente entre todas aquelas que resulten factibles para a conexión do Porto Seco de Monforte de Lemos coa estrada LU-546, tendo en conta para isto os condicionantes de carácter técnico, urbanístico, impacto ambiental, social e características xeolóxicas, xeotécnicas e topográficas dos terreos, seleccionando e propoñendo a opción máis recomendable dende os distintos puntos de vista.
De acordo co establecido no artigo 15.1 da Lei 4/1994, do 14 de setembro, de estradas de Galicia, o mencionado estudo informativo sométese ao trámite de información pública, durante un período de trinta días hábiles, contados a partir do seguinte ao da publicación deste anuncio no Diario Oficial de Galicia, para que as persoas que o consideren oportuno poidan formular, por escrito diante a Axencia Galega de Infraestruturas, as observacións que crean convenientes relativas ás circunstancias que xustifiquen a declaración de interese xeral da estrada e sobre a concepción global do seu trazado.
Así mesmo, durante este período sométese ao trámite de información pública o estudo de impacto ambiental contido no estudo informativo, segundo o Decreto 442/1990, do 13 de setembro, de avaliación de impacto ambiental para Galicia e o Real decreto lexislativo 1/2008, do 11 de xaneiro, polo que se aproba o texto refundido da Lei de avaliación de impacto ambiental de proxectos.
A exposición ao público, para os efectos da presente resolución, realízase na Axencia Galega de Infraestruturas, no Servizo de Infraestruturas de Lugo e no concello de Monforte de Lemos. Así mesmo, na páxina web da Consellería de Medio Ambiente, Territorio e Infraestruturas (http://www.cmati.xunta.es/portal/cidadan/cache/offonce/lang/gl/pid/2915), atópase a disposición dos interesados un documento resumo do estudo.
Santiago de Compostela, 29 de xuño de 2012
Ethel Vázquez Mourelle
Directora da Axencia Galega de Infraestruturas