De conformidade co establecido nas bases dos procedementos de traslados internos, dentro das institucións sanitarias de atención especializada do Servizo Galego de Saúde, do persoal estatutario fixo correspondente ás categorías de persoal sanitario diplomado, sanitario de formación profesional e de xestión e servizos, aprobadas pola Administración e polas organizacións sindicais con representación na mesa sectorial do Servizo Galego de Saúde o día 23 de decembro de 2009, e tras negociacións mantidas coa Comisión de Centro do Complexo Hospitalario de Pontevedra que deron como resultado o asinamento das bases desta convocatoria o día 1 de xuño de 2012,
RESOLVO:
Convocar procedemento de mobilidade interna voluntaria do persoal fixo das categorías de xestión e servizos, persoal sanitario diplomado e sanitario de formación profesional do Complexo Hospitalario de Pontevedra, así como o persoal funcionario e laboral fixo das categorías asimiladas que cumpran os requisitos exixidos.
As bases íntegras da convocatoria e os postos ofertados achéganse como anexo I e II desta resolución, respectivamente.
As solicitudes, anexo III e documentación que conteña a xustificación dos requisitos e méritos alegados deberán presentarse no rexistro do Complexo Hospitalario no prazo dun mes a partir do día seguinte ao da publicación do anuncio indicativo no DOG.
Así mesmo, poderán presentarse a través de calquera dos rexistros previstos no artigo 38 da Lei 30/1992, do 26 de novembro, de réxime xurídico das administración públicas e do procedemento administrativo común.
Contra esta resolución e as bases do procedemento poderá interpoñerse recurso de alzada ante a Dirección de Recursos Humanos do Servizo Galego de Saúde, no prazo dun mes, contado a partir do día seguinte ao da súa publicación, nos termos previstos nos artigos 114 e 115 da Lei 30/1992, do 26 de novembro, de réxime xurídico das administracións públicas e do procedemento administrativo común, segundo a redacción dada pola Lei 4/1999, do 13 de xaneiro.
Pontevedra, 1 de xuño de 2012
José Manuel González Álvarez
Xerente de Xestión Integrada de Pontevedra e O Salnés