O tribunal nomeado pola Orde do 13 de decembro de 2011 (DOG n.º 241, do 20 de decembro) para cualificar o proceso selectivo para o ingreso no corpo facultativo de grao medio da Xunta de Galicia, subgrupo A2, escala de arquitectos técnicos, acordou, de conformidade co disposto na base II.1.2.6 da convocatoria, que o terceiro exercicio da oposición terá lugar o día 4 de maio de 2012, na Escola Galega de Administración Pública (EGAP), sita na rúa de Madrid, núms. 2-4 (As Fontiñas) en Santiago de Compostela, na aula 17, en chamamento único que se iniciará ás 16.00 horas.

Os aspirantes deberán ir provistos de DNI ou documento fidedigno acreditativo da súa identidade, a xuízo do tribunal, e bolígrafo de tinta azul.

En relación cos textos legais de que se poderán servir para o desenvolvemento do exercicio, admitiranse as súas versións consolidadas, aquelas nas cales figuren notas de vixencia e/ou referencias cruzadas a outras normas e os subliñados simples sempre que non inclúan ningunha outra información, comentario doutrinal ou referencia xurisprudencial. Así mesmo, excluiranse os libros de consultas, temarios, informes ou ditames de calquera tipo.

Durante o desenvolvemento do exercicio, os membros do tribunal poderán examinar o material que está a utilizar cada aspirante e comprobar se se axusta ao establecido nos parágrafos anteriores. O manexo de textos normativos distintos dos permitidos determinarán a expulsión do/a aspirante.

Non se permitirá o acceso ás aulas en que se realice o exercicio con calculadoras, teléfonos móbiles, axendas electrónicas ou calquera outro instrumento de que se poida valer o aspirante para auxiliarse na realización do exercicio. Non se habilitará ningún servizo de recollida de móbiles.

De se considerar oportuno, poñeranse calculadoras estandarizadas á disposición dos opositores.

Santiago de Compostela, 16 de abril de 2012.

Xan Xosé Castro Dapena
Presidente do tribunal