Pola Orde do 3 de novembro de 2011 convocouse concurso de traslados entre persoal funcionario docente dos corpos de catedráticos e profesores de ensino secundario, escolas oficiais de idiomas, música e artes escénicas, artes plásticas e deseño, profesores técnicos de formación profesional, mestres de taller de artes pláticas e deseño, mestres, inspectores ao servizo da administración educativa e inspectores de educación.
Procede agora facer pública a adxudicación provisional dos destinos obtidos neste concurso de traslados, polo que respecta ao corpo de mestres.
Na súa virtude, esta dirección xeral,
DISPÓN:
Primeiro. En virtude desta resolución, facer pública a adxudicación provisional dos destinos obtidos neste concurso aos mestres que figuran no anexo I.
Segundo. Facer pública a relación de excluídos no anexo II polas causas que se indican.
Terceiro. Contra esta resolución provisional, segundo o establecido na base vixésimo oitava da Orde do 3 de novembro de 2011, cabe reclamación no prazo de dez días naturais, contados a partir do día seguinte ao da súa publicación no Diario Oficial de Galicia. O prazo de renuncias será o mesmo que o establecido para reclamacións.
Non obstante, serán admitidas as reclamacións e renuncias presentadas con anterioridade.
As reclamacións e renuncias poderanse presentar en calquera das dependencias a que alude o artigo 38 da Lei de réxime xurídico das administracións públicas e do procedemento administrativo común, así como no centro de destino sempre que, ademáis, se remitan por fax, dentro do prazo establecido, ao Servizo de Profesorado de Educación Infantil e Primaria; número de fax 881 99 92 41.
Santiago de Compostela, 27 de marzo de 2012.
José Manuel Pinal Rodríguez
Director xeral de Centros e Recursos Humanos