A Lei orgánica 2/2010, de saúde sexual e reprodutiva e da interrupción voluntaria do embarazo, establece que, con carácter excepcional, se poderá interromper o embarazo por causas médicas cando se detecten anomalías fetais incompatibles coa vida e así conste nun ditame emitido con anterioridade por un facultativo especialista, distinto do que practique a intervención, ou cando se detecte no feto unha enfermidade extremadamente grave e incurable no momento do seu diagnóstico e así o confirme un comité clínico formado por un equipo pluridisciplinar no cal se integren dous médicos especialistas en xinecoloxía ou obstetricia ou expertos en diagnóstico prenatal e pediatría.
De conformidade co establecido no artigo 16 da Lei orgánica 2/2010, en cada comunidade autónoma haberá cando menos un comité clínico nun centro da rede sanitaria pública. A designación dos seus membros será realizada polas autoridades sanitarias e deberá facerse pública no diario oficial da comunidade autónoma, para un período non inferior a un ano.
Transcorrido o dito prazo desde a designación realizada na Orde do 2 de xullo de 2010, cómpre proceder á súa renovación, entendendo necesario aumentar o número de profesionais suplentes para garantir dispoñibilidade de membros en todo momento.
En consecuencia, en virtude das facultades que me confire o artigo 38 da Lei 1/1983, do 22 de febreiro, reguladora da Xunta e da súa Presidencia, reformada pola Lei 11/1988, do 20 de outubro,
DISPOÑO:
Artigo 1.
Nomear membros titulares do comité clínico as seguintes persoas:
– María Guadalupe Alfonsín Somoza, facultativa especialista en xinecoloxía e obstetricia.
– José Luis Doval Conde, facultativo especialista en xinecoloxía e obstetricia.
– Raquel Martínez Lorenzo, facultativa especialista en pediatría.
Artigo 2.
Nomear membros suplentes do comité clínico as seguintes persoas:
– Eloy Moral Santamaría, facultativo especialista en xinecoloxía e obstetricia.
– José Ramón Pérez Iglesias, facultativo especialista en xinecoloxía e obstetricia.
– Antonio Castro López, facultativo especialista en xinecoloxía e obstetricia.
– Antonio Rodríguez Núñez, facultativo especialista en pediatría.
– Arturo Fuentes Varela, facultativo especialista en pediatría.
– Juan Sánchez Lastres, facultativo especialista en pediatría.
Artigo 3.
A designación dos membros titulares e suplentes do comité clínico establécese para un prazo de dous anos.
Disposición derrogatoria.
Queda derrogada a Orde do 2 de xullo de 2010 pola que se designan os membros do comité clínico a que se refiren os artigos 15 e 16 da Lei orgánica 2/2010, do 3 de marzo, publicada no Diario Oficial de Galicia do 5 de xullo de 2010.
Disposición derradeira.
A presente orde entrará en vigor o mesmo día da súa publicación no Diario Oficial de Galicia.
Santiago de Compostela, 12 de marzo de 2012.
Rocío Mosquera Álvarez
Conselleira de Sanidade