Dentro do plan de actividades da Escola Galega de Administración Pública para o ano 2012 e de acordo coas funcións atribuídas pola Lei 4/1987, do 27 de maio, de creación da Escola, e pola Lei 10/1989, do 10 de xullo, de modificación da anterior, convócase, en colaboración co Colexio de Arquitectos de Galicia e a Dirección Xeral de Administración Local, a Xornada sobre as instrucións de desenvolvemento da Lei 9/2002, do 30 de decembro, de ordenación urbanística e do medio rural de Galicia, na redacción dada pola Lei 2/2010, do 25 de marzo, conforme as seguintes bases:
1. Obxectivos.
Difundir as catro instrucións de desenvolvemento da LOUG, os requisitos, o seu procedemento para facelas efectivas, e os efectos.
2. Contidos.
Serán tratados, entre outros, os seguintes temas:
– Instrución 1/2011, do 12 de abril, para a aplicación da Lei 2/2010, do 25 de marzo, de medidas urxentes de modificación da Lei 9/2002, do 30 de decembro, de ordenación urbanística e protección do medio rural de Galicia.
– Instrución 2/2011, do 12 de abril, para a aplicación da disposición transitoria terceira da Lei 2/2010, do 25 de marzo, de medidas urxentes de modificación da Lei 9/2001, do 30 de decembro, de ordenación urbanística e protección do medio rural de Galicia, sobre edificacións sen licenza.
– Instrución 3/2011, do 12 de abril, para a aplicación da disposición transitoria décimo terceira da Lei 9/2002, do 30 de decembro, de ordenación urbanística e protección do medio rural de Galicia, na redacción dada pola Lei 2/2010, do 25 de marzo.
– Instrución 4/2011, do 12 de abril, sobre a metodoloxía de cálculo do grao de consolidación edificatoria na delimitación do solo de núcleo rural, ao abeiro do disposto na Lei 2/2010, do 25 de marzo, de medidas urxentes de modificación da Lei 9/2002, do 30 de decembro, de ordenación urbanística e protección do medio rural de Galicia.
3. Destinatarios.
Arquitectos, técnicos das diferentes administracións públicas vinculados co urbanismo e interesados en xeral.
4. Desenvolvemento.
Esta xornada desenvolverase na Escola Galega de Administración Pública (EGAP) o día 2 de marzo de 2012.
Duración: 6 horas lectivas, en horario de mañá e tarde.
5. Número de prazas.
Limitado pola capacidade do local.
6. Solicitudes.
Inscrición e pagamento de dereitos no COAG.
7. Prazo.
O prazo de presentación de solicitudes finalizará o mércores 29 de febreiro de 2012.
8. Modificacións.
A EGAP reserva para si a facultade de interpretar e de resolver as incidencias que poidan xurdir no desenvolvemento desta xornada, así como a facultade de cancelala se o escaso número de solicitudes non xustifica a súa realización.
9. Certificado de asistencia.
Entregarase un certificado de asistencia, ao final da xornada, a aquelas persoas inscritas que participen asiduamente, e sempre que a súa asistencia sexa igual ou superior ao 85% das horas lectivas programadas. Neste documento aparecerán de forma expresa o contido, a data e o lugar de realización desta xornada.
Santiago de Compostela, 17 de febreiro de 2012.
Pablo Figueroa Dorrego
Director da Escola Galega de Administración Pública