Por Resolución do 8 de novembro de 2011 convócanse probas selectivas para cubrir sete prazas vacantes da escala técnica superior de administración da USC, catro pola quenda de promoción interna e tres pola quenda de acceso libre, publicada no Diario Oficial de Galicia do 22 de novembro de 2011.

O reitor, ao abeiro do establecido no artigo 13.1 do Real decreto 364/1995, do 10 de marzo, e no uso das atribucións conferidas polo artigo 20 da Lei orgánica 6/2001, do 21 de decembro, de universidades, así como nos estatutos desta universidade, resolve:

Modificar a composición do tribunal que figura na convocatoria e nomear os seguintes membros:

– José Antonio Redondo López, catedrático de universidade do Departamento de Economía Financeira e Contabilidade da USC, como vogal titular en substitución de Francisco Carracedo Doce.

– Luis Míguez Macho, profesor titular de universidade do Departamento de Dereito Público e Teoría do Estado da USC, como vogal titular en substitución de Xosé Antón Freire Ramos.

– María da Alba Nogueira López, profesora titular de universidade do Departamento de Dereito Público e Teoría do Estado da USC, como vogal titular en substitución de Carlos Alberto Gómez Otero.

– Francisco Carracedo Doce, funcionario de carreira da escala técnica superior de administración da USC, como presidente suplente en substitución de Josefa Recalde Fernández.

– María Loreto Fernández Fernández, profesora titular de universidade do Departamento de Economía Financeira e Contabilidade da USC, como vogal suplente en substitución de Manuel Clavero Iglesias.

– María Teresa Carballeira Rivera, profesora titular de universidade do Departamento de Dereito Público e Teoría do Estado da USC, como vogal suplente en substitución de Inés Martínez Bermúdez.

– César García Novoa, catedrático de universidade do Departamento de Dereito Público Especial da USC, como vogal suplente en substitución de Xoán Carlos Montes Somoza.

Contra esta resolución, que esgota a vía administrativa, poderase interpoñer un recurso contencioso-administrativo, ante o Xulgado do Contencioso-Administrativo de Santiago de Compostela, no prazo de dous meses contados desde o día seguinte ao da súa publicación, de conformidade co disposto na Lei 29/1998, do 13 de xullo, reguladora da xurisdición contencioso-administrativa.

Non obstante, as persoas interesadas poderán interpoñer recurso potestativo de reposición, no prazo dun mes, perante o órgano que a ditou. Neste caso non se poderá interpoñer o dito recurso contencioso-administrativo mentres non recaia resolución expresa ou presunta do recurso administrativo de reposición, ao abeiro do artigo 116 e seguintes da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro.

Santiago de Compostela, 20 de xaneiro de 2012.

Juan José Casares Long
Reitor da Universidade de Santiago de Compostela