A Lei 9/2010, do 4 de novembro, crea e regula Augas de Galicia, ente público empresarial da Administración da Comunidade Autónoma de Galicia, adscrito á consellería competente en materia de augas, e con personalidade xurídica propia e plena capacidade de obrar para o cumprimento dos seus fins e das competencias reguladas pola dita lei.
O 13.1.2012 foi publicado no Diario Oficial de Galicia o Decreto 32/2012, do 12 de xaneiro, polo que se aproba o Estatuto da entidade pública empresarial Augas de Galicia. Esta entidade instrumental será a responsable de materializar a política en materia de augas no ámbito das competencias que corresponden á Xunta de Galicia e substitúe nestas funcións o organismo autónomo Augas de Galicia e a Empresa Pública Obras e Servizos Hidráulicos que se extinguen coa súa constitución e posta en funcionamento, de acordo cos criterios de eficacia, economía e austeridade que deben inspirar a actuación e a organización administrativa.
A actividade de Augas de Galicia estará suxeita ao réxime xurídico das administracións públicas e do procedemento administrativo común cando exerza potestades administrativas.
Segundo o previsto no artigo 6 do citado estatuto, a presidencia de Augas de Galicia será exercida pola persoa titular da consellería competente en materia de augas.
Na actualidade concorren na persoa titular da Consellería de Medio Ambiente, Territorio e Infraestruturas competencias propias da súa condición de membro do Goberno da Xunta de Galicia e de titular da Presidencia de Augas de Galicia. Esta actividade administrativa leva consigo unha concentración de funcións cuxo volume aconsella naqueles asuntos que non exixan unha atención directa e persoal recorrer á delegación de competencias.
Son as competencias propias da persoa titular da Presidencia de Augas de Galicia as que son obxecto de delegación a través desta resolución, respectando os principios que informan a actividade administrativa, e co fin de ordenar esta co obxecto de acadar unha maior axilidade e eficacia na xestión administrativa.
En consecuencia, de acordo co disposto na Lei 9/2010, do 4 de novembro, de augas de Galicia, na Lei 16/2010, do 17 de decembro, de organización e funcionamento da Administración xeral e do sector público autonómico de Galicia, e na Lei 1/1983, do 22 de febreiro, reguladora da Xunta de Galicia e da súa Presidencia,
RESOLVO:
Primeiro.
Delégase na persoa titular da Dirección de Augas de Galicia o exercicio das seguintes competencias:
1. En materia de reclamacións previas, a resolución das que se presenten contra actos de Augas de Galicia susceptibles de impugnación ante a xurisdición civil ou laboral.
2. En materia de contratación, as competencias que lle corresponden á persoa titular da Presidencia de Augas de Galicia segundo o establecido no texto refundido da Lei de contratos do sector público aprobado polo Real decreto lexislativo 3/2011, do 14 de novembro, e demais disposicións vixentes; en particular, as seguintes facultades:
a) En relación aos contratos menores no ámbito de competencias de Augas de Galicia, as facultades atribuídas á persoa titular da Presidencia de Augas de Galicia.
b) En relación aos contratos que non teñan a consideración de contratos menores: a aprobación dos proxectos e das súas modificacións; a aprobación dos expedientes de contratación; a aprobación dos pregos de prescricións técnicas; a aprobación dos pregos de cláusulas administrativas; a aprobación do gasto correspondente; de ser o caso, dispoñer a súa tramitación urxente ou adoptar as medidas pertinentes no suposto de tramitación de emerxencia; a adxudicación e formalización dos contratos; a súa dirección, inspección e control, podendo ditar as instrucións oportunas para o fiel cumprimento do acordado e exercer todas aquelas facultades que a lexislación de contratación administrativa lle atribúe ao órgano de contratación en relación coas incidencias que xurdan durante a súa execución; a prerrogativa da súa interpretación e resolver as dúbidas que ofreza o seu cumprimento, a aprobación das súas modificacións por razóns de interese público; acordar a súa resolución e determinar os efectos desta e as restantes facultades que, de acordo coa lexislación vixente, lle corresponden ao órgano de contratación.
3. En materia de xestión patrimonial, o exercicio das facultades que a Lei 5/2011, do 30 de setembro, do patrimonio da Comunidade Autónoma de Galicia e demais normativa en materia de patrimonio lle atribúan ao órgano unipersoal de goberno da entidade pública instrumental, en relación aos bens adscritos ou susceptibles de seren adscritos a Augas de Galicia.
4. En materia de potestade sancionadora, o exercicio da competencia para resolver os procedementos sancionadores por infraccións graves en materia de augas.
5. En materia de recursos contra actos doutras administracións, resolver e formular os requirimentos previos á vía xudicial contencioso-administrativa nos termos previstos no artigo 44 da Lei 29/1998, do 13 de xullo, reguladora da xurisdición contencioso-administrativa.
6. En materia de comisións de servizo, a designación das comisións de servizo con dereito a indemnización previstas no Decreto 144/2001, do 7 de xuño, sobre indemnizacións por razón do servizo ao persoal con destino na Administración autonómica de Galicia.
7. En materia de colaboración técnica e financeira coas entidades locais, as competencias que se lle atribúan á persoa titular da Presidencia de Augas de Galicia.
Segundo.
Delégase na persoa titular da Secretaría Xeral Técnica da Consellería de Medio Ambiente, Territorio e Infraestruturas o exercicio da competencia para resolver os recursos administrativos de alzada por infraccións leves en materia de augas e, de ser o caso, suspender a executividade dos actos impugnados.
Terceiro. Criterios complementarios na aplicación das delegacións.
Na aplicación das delegacións de competencias contidas nesta resolución teranse en conta os seguintes criterios:
1. O exercicio das competencias que se delegan nesta resolución axustarase ao disposto no artigo 13 da Lei 30/1992, do 26 de novembro, de réxime xurídico das administracións públicas e do procedemento administrativo común e no artigo 6 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia.
2. En calquera momento o órgano delegante poderá revogar o exercicio das competencias que se delegan ou avogar as competencias para o coñecemento dun asunto concreto.
3. Enténdese comprendida na delegación o exercicio da competencia para resolver os recursos de reposición que se interpoñan contra as resolucións que se diten en virtude das competencias que se lle delegan nesta resolución e para, se é o caso, suspender a executividade dos actos impugnados.
4. As competencias que se delegan por esta resolución, no caso de ausencia, vacante ou enfermidade da persoa titular da Dirección de Augas de Galicia e mentres persistan aquelas circunstancias, serán exercidas pola persoa titular da Secretaría Xeral Técnica da Consellería de Medio Ambiente, Territorio e Infraestruturas. No caso de ausencia, vacante ou enfermidade da persoa titular da Secretaría Xeral Técnica da Consellería de Medio Ambiente, Territorio e Infraestruturas, as competencias que se delegan por esta resolución serán exercidas de acordo co establecido no Decreto 44/2012, do 19 de xaneiro, polo que se establece a estrutura orgánicas da Consellería de Medio Ambiente, Territorio e Infraestruturas.
Cuarto. Resolucións ditadas por delegación.
As resolucións administrativas que se adopten facendo uso das delegacións contidas nesta resolución farán constar expresamente esta circunstancia e consideraranse ditadas polo órgano delegante.
Quinto. Eficacia.
Esta resolución producirá efectos a partir do mesmo día da súa publicación no Diario Oficial de Galicia.
Santiago de Compostela, 30 de xaneiro de 2012.
Agustín Hernández Fernández de Rojas
Presidente de Augas de Galicia