O Pleno da Corporación, na sesión ordinaria que tivo lugar o día 24 de novembro de 2011, adoptou, entre outros, o seguinte acordo:

Aprobar definitivamente a modificación puntual do Plan parcial de ordenación do solo urbanizable programado número 5 (SUP-5) no ámbito da dotación EU-7, A Choupana, formulado pola Universidade de Santiago de Compostela (USC), sen máis modificacións respecto do inicialmente aprobado que a incorporación do anexo xustificativo do cumprimento das condicións de accesibilidade.

O acordo notificarase persoalmente aos interesados e publicarase no Diario Oficial de Galicia e no Boletín Oficial da provincia, no cal se inserirá, así mesmo, a normativa urbanística aprobada segundo o artigo 92 da Lei de ordenación urbanística e protección do medio rural de Galicia (LOUG).

Así mesmo, remitirase á Consellería de Medio Ambiente, Territorio e Infraestruturas comunicación do acordo de aprobación definitiva, xunto con dous exemplares dilixenciados do proxecto definitivamente aprobado.

O acordo de aprobación definitiva da citada modificación puntual do plan parcial foi comunicado á Consellería de Medio Ambiente, Territorio e Infraestruturas con data do 28 de novembro de 2011, en cumprimento do disposto polo artigo 92.3 da Lei 9/2002, do 30 de decembro, de ordenación urbanística e protección do medio rural de Galicia (LOUG).

O anuncio de aprobación definitiva, xunto coa normativa, publicouse no Boletín Oficial da provincia da Coruña número 238, do 16 de decembro de 2011.

Contra o acordo de aprobación definitiva poderase interpoñer directamente recurso contencioso-administrativo, ante o Tribunal Superior de Xustiza de Galicia, no prazo de dous meses contado a partir do día seguinte ao da publicación deste anuncio.

Santiago de Compostela, 16 de decembro de 2011.

Gerardo Conde Roa
Alcalde