A Xerencia de Xestión Integrada da Coruña, en virtude das competencias atribuídas polo Decreto 311/2009, do 28 de maio (DOG número 109, do 5 de xuño), polo que se establece a estrutura orgánica do Servizo Galego de Saúde, e a Orde do 15 de xuño de 2009, modificada pola Orde do 28 de setembro de 2011 (DOG número 188, do 30 de setembro), sobre delegación de competencias en órganos centrais e periféricos do Servizo Galego de Saúde, resolve anunciar a convocatoria para a vinculación temporal mediante un nomeamento interino en praza vacante, por concurso de méritos, dunha praza de persoal licenciado sanitario especialista en radiodiagnóstico.
O prazo de presentación de solicitudes será de quince días naturais contados desde o seguinte ao da publicación desta convocatoria no Diario Oficial de Galicia. As solicitudes, que deberán dirixirse á Xerencia de Xestión Integrada da Coruña, poderán presentarse no Rexistro Xeral do Hospital A Coruña, así como a través de calquera dos procedementos do artigo 38 da Lei 30/1992, do 26 de novembro, de réxime xurídico das administracións públicas e do procedemento administrativo común.
As bases íntegras da convocatoria estarán expostas nos taboleiros de anuncios do Hospital A Coruña, así como na páxina web do Servizo Galego de Saúde (www.sergas.es).
A Coruña, 1 de decembro de 2011.
Alfredo García Iglesias
Xerente de Xestión Integrada da Coruña